Të biesh në rrjetën e SPAK është hall. Por mund të jetë edhe bekim. Të paktën kështu ka rezultuar për një biznesmen të quajtur Ndoc Kulla.
Zoti Kulla është pronar i kompanisë Jubica. Në fund të muajit qershor, ai u mor zyrtarisht i pandehur nga SPAK me akuzën e “falsifikimit të vulave, stampave ose formularëve.”
Spak e akuzon biznesmenin se ka falsifikuar dokumentat për tenderin e famshëm të mirëmbajtjes së rrugës Shpal-Rrëshen me vlerë 2.3 milionë euro.
Por nga momenti kur u mor i pandehur, kompania e tij Jubica, ka marrë dy tendera të majmë. Fillimisht atë për përmirësimin e sinjalistikës në akset rrugore të Shkodrës me vlerë 2 milionë euro. Ndërsa më vonë Jubica u shpall fituesja përfundimtare edhe e tenderit për mirëmbajtjen e rrugës Tamarë-Vermosh me vlerë 3.3 milionë euro. Tek kjo kontrata e dytë edhe me ndihmën e madhe të Komisionit të Prokurimit Publik.
Në total 5.5 milionë euro kontrata publike pas marrjes si i pandehur nga SPAK për falsifikim dokumentesh dhe mashtrim të shtetit.
Pra, të biesh në rrjetën e SPAK nuk është vetëm hall. Në Shqipërinë e rilindur është edhe bekim. Sepse miliardat nga buxheti vazhdojnë. Madje, me ritëm edhe më të lartë./kapitali.al
