Një analizë e thjeshtë gjaku mund të bëjë të mundur përcaktimin e moshës biologjike dhe jetëgjatësisë së 11 organeve kryesore të trupit të njeriut. Testi është zhvilluar nga studiues të Stanford University dhe pritet që, nëse rezultatet konfirmohen, të jetë i disponueshëm në treg brenda tre viteve të ardhshme.
Përveç vlerësimit të procesit të plakjes së organeve, testi synon të parashikojë edhe rrezikun e zhvillimit të sëmundjeve që mund t’i prekin ato gjatë dhjetë viteve pas kryerjes së analizës. Në vlerësim përfshihen organe dhe sisteme të rëndësishme si truri dhe zorrët.
Aktualisht metoda ndodhet ende në fazë eksperimentale dhe rezultatet e saj janë publikuar në revistën shkencore Nature Medicine.
Sipas autorëve të studimit, organet e trupit nuk plaken me të njëjtin ritëm. Qëllimi i kërkimit është identifikimi dhe monitorimi i sinjaleve biologjike që tregojnë ndryshimet e plakjes në secilin organ.
Studimi është mbështetur në analizën e të dhënave të mbledhura gjatë 17 viteve nga rreth 600 mijë pjesëmarrës të projektit UK Biobank. Studiuesit kanë analizuar rreth 3 mijë proteina të pranishme në gjak, disa prej të cilave lidhen drejtpërdrejt me funksionimin e organeve të ndryshme, si truri, muskujt, zemra, mushkëritë, arteriet, mëlçia, veshkat, pankreasi, sistemi imunitar, zorrët dhe indet.
Një nga gjetjet më të rëndësishme të deritanishme lidhet me trurin, i cili konsiderohet një faktor kyç për jetëgjatësinë. Rezultatet tregojnë se një tru biologjikisht më i plakur shoqërohet me një rrezik më të lartë vdekshmërie, ndërsa një tru që ruan karakteristikat e rinisë biologjike lidhet me një jetë më të gjatë dhe më të shëndetshme.
