Qendra Kombëtare e Biznesit (QKB) ka njoftuar se 31,000 subjekte dorëzuan bilancet brenda afatit ligjor të 31 korrikut 2025, duke shënuar një nga performancat më të larta të viteve të fundit në këtë proces. Sipas të dhënave zyrtare, mbi 90% e bizneseve përmbushën detyrimin në kohë, një shifër që tejkalon dukshëm vitet pararendëse: në vitin 2024 u dorëzuan 28,200 bilance në afat, në 2023 ishin 26,000, ndërsa në 2022 vetëm 20,700.
QKB e vlerëson këtë si një tregues pozitiv të rritjes së ndërgjegjësimit të bizneseve për detyrimet ligjore, por edhe të përdorimit të platformave digjitale si e-Albania, përmes së cilës kryhet procesi i dorëzimit të bilanceve. Megjithatë, eksperienca e këtij viti ka nxjerrë në pah edhe problematika serioze teknike, që rrezikuan të minonin gjithë procesin.
Shoqata dhe përfaqësues të bizneseve, përfshirë Aleancën e Profesionistëve të Lirë (APL), reaguan ndaj vështirësive dhe ngecjeve të sistemit, duke kërkuar masa urgjente për zgjidhjen e situatës. Sipas APL, problemet teknike jo vetëm që shtuan stresin dhe kohën e humbur për profesionistët e kontabilitetit, por rrezikuan të penalizonin biznese që nuk mundën të dorëzonin bilancin në afat për shkak të faktorëve jashtë kontrollit të tyre.
Në këtë kontekst, afërsisht 10% e subjekteve që nuk arritën të përmbushin detyrimin, do të përballen me gjobë prej 60,000 lekësh secila, një penalizim i diskutueshëm në kushtet kur vetë sistemi shtetëror nuk garantoi funksionim të qëndrueshëm.
