Zona të caktuara në Vlorë, Tiranë dhe Himarë mund të përjetojnë rritje të ndjeshme të çmimeve të pronave në vitet e ardhshme. Sipas një studimi të Investropa, Lungomare dhe Uji i Ftohtë në Vlorë, së bashku me Orikumin dhe Radhimën, janë ndër zonat që mund të përfitojnë nga zhvillimi i turizmit dhe përmirësimi i aksesit në bregdetin jugor. Ndërkohë, në kryeqytet, vëmendja zhvendoset te Selita dhe Kinostudio, ku çmimet janë ende më të ulëta krahasuar me zonat qendrore.
Sipas projeksioneve të Investropa, zonat përgjatë bregdetit të Vlorës mund të regjistrojnë rritjen më të lartë të çmimeve, me 10% deri në 15% në vit, në kushtet e pritshmërive për përmirësimin e lidhjeve të transportit dhe shtimin e kërkesës turistike. Hapja e Aeroportit Ndërkombëtar të Vlorës shihet si një prej faktorëve që mund të ndikojë në këtë ecuri, duke lehtësuar mbërritjen e vizitorëve të huaj dhe duke rritur interesin për investime në prona.
Përtej zonave kryesore të qytetit, potencial për rritje paraqesin edhe Orikumi dhe Radhima, të cilat po fitojnë vëmendje si alternativa përtej zonave më të konsoliduara të Rivierës Shqiptare. Sipas vlerësimeve të Investropa, çmimet në këto zona mund të rriten me 8% deri në 12% në vit, të nxitura nga përhapja e kërkesës nga Vlora drejt destinacioneve përreth. Zgjerimi i interesit për akomodim turistik dhe prona për përdorim sezonal mund të ndikojë në zhvillimin e mëtejshëm të tregut lokal.
Një tjetër zonë bregdetare që pritet të tërheqë interes është Himara. Kufizimet e hapësirave të disponueshme për ndërtim dhe kërkesa në rritje për prona në këtë destinacion janë ndër faktorët që, sipas studimit, mund të mbështesin një rritje vjetore të çmimeve prej 7% deri në 11%.Ecuria reale do të varet nga zhvillimet infrastrukturore, kërkesa për blerje, oferta e re e banesave dhe kushtet e përgjithshme të tregut të pasurive të paluajtshme./scan.tv
