Rritja e kapaciteteve të energjisë së rinovueshme po shton presionin mbi rrjetin e transmetimit në Shqipëri, duke krijuar nevojën për investime të konsiderueshme. Ministri i Transportit dhe Energjisë, Enea Karakaçi, thotë se financimi i tyre nuk duhet të rëndojë tërësisht mbi konsumatorët shqiptarë, veçanërisht kur energjia e prodhuar shkon për eksport.
Çështja u diskutua në një takim me prodhues të energjisë elektrike, deputetë të Komisionit të Burimeve Natyrore dhe drejtues të institucioneve të sektorit energjetik.
Sipas të dhënave të bëra publike nga ministri, aktualisht në vend janë në operim rreth 700 megavat kapacitete fotovoltaike. Ndërkohë, rreth 1.000 megavat të tjerë janë në ndërtim ose në faza procedurash, çka pritet të rrisë më tej kërkesat për lidhjen dhe transmetimin e energjisë.
Karakaçi paralajmëroi se rrjeti nuk është ndërtuar për këtë nivel të ri prodhimi dhe se në disa zona kapaciteti i tij është pranë kufirit. Për përballimin e investimeve të nevojshme, po shqyrtohen modele financimi sipas praktikave të Bashkimit Europian.
“Nuk është e drejtë që e gjithë barra të bjerë mbi konsumatorin shqiptar”, u shpreh ministri, duke e lidhur këtë qëndrim me prodhimin e energjisë për eksport në tregjet rajonale dhe europiane.
Paralelisht, qeveria po punon me Bankën Europiane për Rindërtim dhe Zhvillim për një ankand të ri të energjisë fotovoltaike, që këtë herë do të përfshijë edhe bateritë për depozitimin e saj. Sipas Karakaçit, interesi për këto sisteme është në rritje.
Ministri tha gjithashtu se ligji i ri e ka përafruar më tej Shqipërinë me rregullat europiane të tregut të energjisë, duke krijuar më shumë mundësi për integrimin në tregjet rajonale dhe europiane./skyweb.al
