Konsumatorët shqiptarë rrezikojnë një tjetër shtrenjtim të karburanteve, në një treg ku çmimet dhe ngarkesa fiskale janë tashmë të larta. Sipas përllogaritjeve të operatorëve, skema e re për rezervën e sigurisë mund të shtojë deri në 6.1 lekë për litër, raporton Monitor.al.
Detyrimi për rezervë nuk është i ri. Ligji nr.8450 i vitit 1999 ua ngarkonte rafinerive dhe tregtarëve me shumicë. Ndryshimet e mëvonshme parashikuan rritjen nga 30 ditë shitje në 60 ditë prej vitit 2007 dhe në 90 ditë prej vitit 2010.
Rezerva shtetërore e naftës mund të sjellë një tjetër shtrenjtim të karburanteve
Projektligji i miratuar nga qeveria dhe i dërguar në Kuvend ndryshon modelin: administrimi kalon te një autoritet publik, ndërsa financimi mbështetet edhe te një tarifë mbi karburantet. Nivelin e saj do ta përcaktojë Këshilli i Ministrave.
Shifra prej 3 lekësh për litër është supozim për përllogaritjen e kostove, ende jo tarifë përfundimtare. Operatorët vlerësojnë se, bashkë me TVSH-në, ajo bëhet 3.6 lekë, ndërsa kostot e rezervave tregtare shtojnë edhe 2.5 lekë të tjera.
Plani parashikon krijimin e rreth 238 mijë tonëve rezervë gjatë pesë viteve, me një kosto të vlerësuar rreth 200 milionë euro.
Kjo barrë do t’u shtohej akcizës, TVSH-së, taksës së qarkullimit, taksës së karbonit dhe tarifave të tjera që rëndojnë aktualisht çmimin e karburanteve.
Sipas përllogaritjeve të raportuara nga “Monitor”, taksat përbëjnë rreth 90–100 lekë për litër. Skema e re do të shtonte kështu një tjetër kosto mbi një produkt që qytetarët dhe bizneset e paguajnë tashmë shtrenjtë.
Opozita ka propozuar që krijimi i rezervës të financohet nga buxheti i shtetit, ndërsa operatorët kundërshtojnë kalimin e kostos te konsumatori.
