Gjiganti gjerman i veshjeve sportive pretendon se marka australiane ka përdorur një dizajn që ngjan me logon e saj ikonike me tri vija. White Fox mohon shkeljen e markës tregtare.
Adidas ka nisur një betejë ligjore kundër markës australiane të modës White Fox, duke e akuzuar për përdorimin e një dizajni me katër vija që, sipas kompanisë gjermane, mund të ngatërrohet me logon e saj të njohur me tri vija.
Sipas pretendimeve të Adidas, që prej muajit mars kompania i ka kërkuar vazhdimisht White Fox të ndalojë shitjen dhe reklamimin e produkteve me këtë dizajn, por kërkesat nuk janë pranuar.
Çështja është shqyrtuar në Gjykatën Federale të Australisë, ku përfaqësuesit ligjorë të White Fox kanë mohuar shkeljen e markës tregtare. Mbrojtja pritet të argumentojë se edhe marka të tjera të njohura të modës përdorin vija dekorative të ngjashme në veshjet e tyre.
Kompania gjermane pretendon se White Fox po përpiqet të përfitojë nga reputacioni i krijuar prej saj ndër vite dhe se ngjashmëria mes dizajneve mund t’i bëjë konsumatorët të besojnë se dy markat kanë lidhje me njëra-tjetrën.
Në kuadër të procesit gjyqësor, Adidas ka kërkuar dëmshpërblim, duke përfshirë fitimet e realizuara nga shitja e produkteve të kontestuara, interesat dhe shpenzimet ligjore.
Si pjesë të provave, kompania ka paraqitur fotografi krahasuese të produkteve dhe materiale reklamuese të White Fox. Sipas dokumenteve të paraqitura nga Adidas, në disa prej këtyre materialeve shfaqen edhe atlete origjinale të markës gjermane, ndërsa vijat karakteristike të logos pretendohet se janë modifikuar ose hequr pas nisjes së procedurave ligjore.
Adidas e ka të regjistruar dizajnin me tri vija në Australi që prej vitit 1957 dhe ka një histori të gjatë mbrojtjeje të këtij elementi dallues. Në vitin 2013, kompania fitoi gjithashtu një çështje të ngjashme në vend kundër kompanisë Pacific Brands.
Nga ana tjetër, White Fox, e themeluar në vitin 2013, është një markë e modës së shpejtë që ka fituar popullaritet te konsumatorët e rinj në Australi, Mbretërinë e Bashkuar dhe Shtetet e Bashkuara.
Sipas të dhënave të cituara nga Australian Financial Review, kompania realizoi të ardhura prej 542 milionë dollarësh australianë gjatë vitit financiar që përfundoi në qershor 2025.
Procesi gjyqësor pritet të zhvillohet në fillim të vitit 2027 dhe të zgjasë tre deri në katër ditë. Deri në një vendim përfundimtar, pretendimet e Adidas mbeten akuza që duhet të shqyrtohen nga gjykata. /skyweb.al
