Disa njerëz në SHBA “ende nuk e pëlqejnë pamjen e paneleve diellore”, pranon Kate Collardson.
Ajo e njeh mirë këtë çështje. Collardson merret me operacionet në kompaninë Solar Service of Colorado, e cila ofron shërbime mirëmbajtjeje dhe inspektimi për sistemet diellore. Ajo ka ushtruar pothuajse çdo profesion tjetër në këtë industri, nga instaluesja deri te instruktorja, shkruan BBC.
Për ata që nuk e pëlqejnë pamjen e paneleve diellore, një alternativë janë çatitë diellore, ku tjegullat ose pllakat e çatisë përmbajnë qeliza diellore, por duken pothuajse njësoj si tjegullat e zakonshme.
Kjo është veçanërisht e rëndësishme për ndërtesat historike, ku rregullat për ruajtjen e trashëgimisë kulturore kufizojnë ndryshimet në pamjen e jashtme.
Për shumë njerëz, produktet e këtij lloji u bënë të njohura për herë të parë në gusht, kur kompania Tesla hoqi nga faqja e saj e internetit ofertën për çatitë diellore. Ky vendim erdhi pas shitjeve zhgënjyese dhe një padie lidhur me rritjet e papritura të çmimeve.
Edhe kompani të tjera janë tërhequr nga ky treg, por vendimi i Teslës shkaktoi veçanërisht reagime të forta në industrinë e çative diellore.
Disa e shohin këtë si një goditje përfundimtare për tjegullat diellore, ndërsa të tjerë e konsiderojnë një mundësi të re.
Për shembull, kompania e vogël zvicerane Freesuns po shqyrton mundësinë e zgjerimit të aktivitetit të saj në SHBA.
Deborah Learoyd, drejtoreshë ekzekutive dhe administruese e Freesuns, vlerëson se shitjet e kompanisë janë rritur me 20–30% që nga themelimi i saj në vitin 2019.
Në përgjithësi, komponentët për çatitë diellore vazhdojnë të prodhohen në seri të vogla. Kjo kufizon përfitimet që mund të arrihen nga prodhimi në shkallë të gjerë dhe standardizimi, megjithëse proceset fleksibël të prodhimit mund të ndihmojnë deri diku në kapërcimin e këtyre pengesave.
Learoyd thotë se kostot për njësi të produkteve të Freesuns po ulen gradualisht, por thekson se “një pjesë e madhe e kostos lidhet pikërisht me faktin se çdo çati është paksa e ndryshme. Për këtë arsye, ajo duhet të projektohet dhe të instalohet në mënyrë të veçantë”.
Instalimi i çative diellore zakonisht kërkon bashkëpunimin e specialistëve të çative, instaluesve të sistemeve diellore dhe elektricistëve. Gjithashtu, rregulloret e ndërtimit për këto sisteme priren të jenë më të ndërlikuara sesa ato që zbatohen për panelet diellore tradicionale.
Koha shtesë dhe dokumentacioni i nevojshëm mund të krijojnë vështirësi financiare për kompanitë që merren me çatitë, shpjegon Collardson.
“Kur përfshin një specialist çatie në këtë proces, ai të thotë: ‘Kjo po zgjat pafundësisht. Po humbas para. Gjatë kohës që më duhet për të shitur këtë projekt të vetëm, mund të kisha siguruar dhjetë kontrata për çati të zakonshme’”, tregon ajo.
Collardson shpjegon se riparimi i tjegullave diellore kushton më shumë sesa mirëmbajtja e një sistemi të zakonshëm fotovoltaik (PV).
“Me sistemet tradicionale diellore, zakonisht kemi pajisje elektronike në panelet diellore dhe një hartë që na tregon saktësisht se sa energji prodhon secili panel”, shpjegon ajo.
Kjo do të thotë se, kur ndodh një problem, është relativisht e lehtë të identifikohet paneli që nuk funksionon siç duhet. /skyweb.al
