Koment nga skyweb.al
Nga Kultura te Turizmi dhe Mjedisi, e tashmë te Arsimi, Mirela Kumbaro është një nga emrat që Edi Rama rikthen dhe zhvendos në kabinetet e tij. Katër emërime ministrore në tri dikastere të ndryshme, që prej vitit 2013.
Me ndërprerjen nga janari 2019 deri në shtator 2021, ajo ka grumbulluar rreth dhjetë vjet e pesë muaj në poste ministrore. Pothuajse dhjetë vjet e gjysmë që firmos për të tashmen dhe të ardhmen e shqiptarëve. Këta që kanë mbushur rrugët sot ishin në pelena kur Rama e bëri Kumbaron ministre për herë të parë.
Tani, protestuesit që i gjuajnë me gurë zyrës së saj kanë tejkaluar edhe shpërthimet seksuale të adoleshencës dhe po shqetësohen për të ardhmen e tyre, por zonja Kumbaro vijon sërish të vendosë për ta.
Çfarë cilësish të jashtëzakonshme ka Kumbaro që e bëjnë të përshtatshme për kaq shumë ministri?
Cilat rezultate e justifikojnë këtë besim të vazhdueshëm? Publikut i duhet një bilanc konkret për secilin sektor që ajo ka drejtuar.
Një nga episodet e bujshme që vazhdon ta ndjekë është mbrojtja në Kuvend e projektit në Gjirin e Manastirit. “Shikojeni këtë pikën e vogël blu këtu. Ja kjo e voçkla këtu”, deklaronte Kumbaro në korrik 2022, duke treguar hartën.
Ajo “pikë e voçkël” që tani është kthyer në një “derr shpelle” të madhe lidhej me territorin ku u zhvillua resorti, pas ndryshimit të kufijve të Parkut Kombëtar të Butrintit.
Vendimi i janarit 2022 për rishikimin e zonave të mbrojtura u miratua me propozimin e ministrit të Turizmit dhe Mjedisit, post që mbante Kumbaro.
Masivi i vilave dhe ndërtimeve në Gjirin e Manastirit e bën shprehjen e saj një simbol të minimizimit të betonizimit.
Para se të vendosë për veten, Rama u detyrohet qytetarëve një shpjegim: Cilat arritje e bëjnë kaq të domosdoshme në qeveri zonjën Kumbaro? /skyweb.al
