Disa tregtarë në Tiranë kanë vendosur në dyert, vitrinat dhe qepenat e dyqaneve mesazhe drejtuar protestuesve. Përmes letrave të thjeshta, ata shprehin mbështetje për protestën dhe kërkojnë që bizneset e tyre të mos dëmtohen.
“Jemi me ju, mos na dëmtoni biznesin”, shkruhet në një prej mesazheve që pasqyron shqetësimin e sipërmarrjeve të vogla për situatën në kryeqytet.
Në vend të njoftimeve për klientët, tregtarët kanë zgjedhur t’u drejtohen njerëzve në rrugë, me shpresën që solidariteti i shprehur të shoqërohet me respektimin e pronës dhe të punës së tyre.
Këto mesazhe vijnë pas tensioneve dhe incidenteve gjatë protestave studentore, të cilat janë shoqëruar me dëmtime të institucioneve, bankave dhe ambienteve të bizneseve private.
Për një dyqan të vogël, thyerja e vitrinës apo dëmtimi i pajisjeve mund të sjellë një barrë të rëndë financiare. Krahas kostos së riparimit, mbyllja e detyruar për disa ditë do të thotë edhe të ardhura të humbura.
Këto pasoja rëndojnë veçanërisht mbi sipërmarrjet familjare, që mbështeten te xhiroja e përditshme për të paguar qiranë, punonjësit dhe furnitorët. Detyrimet vijojnë edhe kur dyqani detyrohet të ndërpresë punën. /skyweb.al
