Gjatë ditëve të protestave të dhunshme në Tiranë janë publikuar pamje dhe denoncime tronditëse për rrahjen e studentëve dhe adoleshentëve nga punonjës të policisë.
Shqetësim të veçantë kanë shkaktuar goditjet gjatë ndalimeve dhe arrestimeve, ku në pamjet e denoncuara kanë spikatur edhe efektivët e forcës së posaçme “Shqiponja”.
Mediat kanë raportuar pamje të rënda të rrahjeve gjatë arrestimeve nga “Shqiponjat”në rrugët e kryeqytetit.
Denoncimet për dhunë ndaj të miturve janë ngritur edhe nga CRCA–ECPAT Shqipëri dhe ALO 116-111.
Organizatat njoftuan se kishin marrë raportime nga media dhe prindër, duke kërkuar hetim të pavarur dhe identifikimin e përgjegjësve.
Por çfarë janë “Shqiponjat” dhe pse po rrahin pa mëshirë?
Sipas Policisë së Shtetit, kjo forcë ka për detyrë parandalimin dhe goditjen e kriminalitetit, si dhe ndërhyrjen në situata që nuk menaxhohen dot nga patrullat e përgjithshme. Njësitë janë pjesë e drejtorive vendore të policisë.
Efektivët dallohen nga jelekët e kuq dhe emblema e posaçme në krah.
Struktura ekzistonte përpara vitit 2013 dhe u rikthye më 2014 nën shembullin e “Delfinëve” në Turqi, kur ministër i Brendshëm ishte Saimir Tahiri.
Më 2020 u zgjerua dhe u strukturua në të gjitha drejtoritë vendore të policisë.
Misioni i ndërhyrjes së shpejtë kërkon përgatitje dhe vetëkontroll.
Pikërisht këtu lind pyetja për sjelljen e jelekëkuqve gjatë arrestimeve: Përse ndalimi i një të riu duhet të shoqërohet me rrahje në grup nga disa efektivë?
Paradoksi bëhet edhe më i fortë në krahasimin me FNSH-në.
Janë efektivët e kësaj force që qëndrojnë në vijën e parë, nën gurë , zjarr dhe sende të forta. Nëse presioni dhe sulmet ndaj policisë do të shpjegonin humbjen e vetëkontrollit, të parët që do ta humbnin durimin do të ishin ata.
Por ndërsa FNSH-ja po tregon njëfarë vetëpërmbajtjeje, përveç ndonjë rasti si ato të dy ditëve të para të protestës, dajakun masiv gjatë ndalimeve po e japin “Shqiponjat”.
Çfarë i shtyn efektivët e përfshirë të sillen kështu?
Mungesa e trajnimit? Mungesa e empatisë njerëzore? Apo dëshira për të treguar zell dhe forcë apo bindja se tejkalimet do të kalojnë pa pasoja?
Po drejtuesit e tyre? Janë të paaftë për t’i kontrolluar apo e tolerojnë ose nxisin këtë sjellje?
Kur protestat të përfundojnë, thëntë Zoti pa pasoja të rënda në njerë, veprimet e “Shqiponjave” duhet t’i nënshtrohen një analize të plotë, nga çdo episod i denoncuar deri te zinxhiri komandues. /skyweb.al
