Ky veprim vjen pas thirrjeve të kryeministrit Edi Rama për komunikim me studentët, në një kohë kur protestat janë shoqëruar me tensione dhe përplasje të dhunshme mes protestuesve dhe forcave të policisë.
Një ditë më parë, Rama u bëri thirrje studentëve të ulen në tryezën e dialogut për të diskutuar shqetësimet dhe kërkesat e tyre.
Vendosja e karrigeve në hyrje të Kryeministrisë duket se synon të përcjellë simbolikisht gatishmërinë e qeverisë për bisedime dhe për të gjetur një rrugëdalje nga situata e krijuar.
Prej disa ditësh, qendra e Tiranës është kthyer në arenë përplasjesh mes protestuesve dhe policisë, ndërsa gjatë protestave janë regjistruar dëmtime të institucioneve publike dhe bizneseve private.
Ndërkohë, më herët Skyweb.al raportoi se kanë nisur tashmë përpjekjet për të ulur në tryezën e dialogut kryeministrin Edi Rama dhe përfaqësuesit e protestuesve, me synimin për të gjetur një rrugë komunikimi mes palëve.
Mbetet për t’u parë nëse këto përpjekje do të konkretizohen në një takim dhe nëse dialogu do të mundësojë uljen e tensioneve dhe adresimin e kërkesave të studentëve. /skyweb.al
