Presidenti i Serbisë, Aleksandar Vuçiç, ka komentuar situatën politike në Shqipëri dhe protestat e ditëve të fundit, duke vlerësuar kryeministrin Edi Rama, të cilin e cilësoi si një nga asetet më të rëndësishme të vendit. Megjithatë, ai tha se mënyra se si Rama ka menaxhuar protestat mund t’i krijojë vështirësi politike, në rast se situata çon në zgjedhje të parakohshme.
Gjatë një interviste në emisionin “Prva tema”, të transmetuar më 21 tetor në televizionin serb Prva, Vuçiç u shpreh se kryeministri shqiptar ka gabuar duke besuar se mund t’i qetësonte protestuesit dhe se kjo i ka kushtuar kohë.
“Rama bëri një gabim. Edi besoi më gjatë se unë se mund t’i zbuste disi. Dhe gaboi. Humbi kohë. Nëse e detyrojnë të shpallë zgjedhje, do ta ketë shumë të vështirë t’i fitojë”, deklaroi presidenti serb.
Pavarësisht kritikave për menaxhimin e situatës, Vuçiç shprehu vlerësim për kreun e qeverisë shqiptare, duke e cilësuar atë si një nga pasuritë më të mëdha të Shqipërisë.
“E gjithë kjo më duket irracionale, sepse ai është një nga pasuritë më të mëdha të Shqipërisë, sido që ta shikosh”, u shpreh Vuçiç.
Diskutimi për zhvillimet në Shqipëri u zhvillua në kuadër të një bisede më të gjerë mbi protestat në disa vende evropiane, përfshirë Francën, si dhe lëvizjet studentore në rajon. Presidenti serb foli edhe për protestat në vendin e tij, duke pretenduar se policia serbe nuk kishte përdorur autobotë uji kundër demonstruesve.
