Klima e besimit në tregun financiar gjerman ka pësuar një rënie të ndjeshme gjatë muajit gusht, duke reflektuar pasiguri të thella mbi të ardhmen e ekonomisë.
Sipas të dhënave të fundit të Institutit ZEW, indeksi i sentimentit ekonomik ra në 34.7 pikë nga 52.7 pikë në korrik, shumë më poshtë parashikimit të analistëve prej 39.8 pikësh.
Ky tregues mat pritshmëritë e investitorëve për ecurinë e ekonomisë në gjashtë muajt e ardhshëm dhe rënia e tij tregon një klimë të zbehur optimizmi.
Shkaku kryesor i kësaj rënieje lidhet me zhgënjimin e investitorëve ndaj marrëveshjes së fundit tregtare mes Bashkimit Europian dhe Shteteve të Bashkuara.
Marrëveshja, e cila u prit me skepticizëm nga disa sektorë, ka sjellë pasoja të menjëhershme negative për industritë gjermane, veçanërisht në prodhimet kimike, farmaceutike, makineri, metalurgji dhe sektorin automobilistik.
Tarifat e vendosura, përfshirë ato prej 50 për qind për çelikun dhe aluminin, kanë rritur kostot e prodhimit dhe kanë dobësuar konkurrueshmërinë e eksportit gjerman në tregjet ndërkombëtare.
Të dhënat zyrtare tregojnë se ekonomia gjermane u tkurr me 0.1 për qind në tremujorin prill–qershor, duke sinjalizuar një ngadalësim të ndjeshëm të aktivitetit ekonomik.
Vlerësimi i situatës aktuale, një tjetër komponent i indeksit ZEW, ra nga –59.5 në –68.6 pikë, duke reflektuar pesimizëm të thelluar në mesin e investitorëve dhe bizneseve.
Presidenti i ZEW, Achim Wambach, theksoi se rënia është e lidhur drejtpërdrejt me zhgënjimin nga marrëveshja tregtare dhe pasojat që ajo ka sjellë në sektorët kryesorë të ekonomisë.
Andreas Scheuerle nga DekaBank e cilësoi marrëveshjen “jo të favorshme për Evropën” dhe paralajmëroi për mundësinë e rritjes së mëtejshme të tarifave.
Nga ana tjetër, Marc Schattenberg i Deutsche Bank sugjeroi se pasiguria e tanishme mund ta pengojë Bankën Qendrore Europiane të ndërmarrë ulje të tjera të normave të interesit.
Elmar Voelker nga LBBW parashikoi se situata do të mbetet sfiduese gjatë muajve të ardhshëm, ndërsa kompanitë pritet të mbajnë një qasje të kujdesshme në vendimmarrje.
Megjithatë, disa ekonomistë mbeten optimistë se paketa e madhe e investimeve publike e miratuar nga qeveria gjermane në mars mund të fillojë të japë efektet e para pozitive në gjysmën e dytë të vitit, duke nxitur rritjen dhe duke rikthyer gradualisht besimin e investitorëve.
Rënia e besimit financiar në ekonominë më të madhe të Eurozonës shihet nga analistët si një sinjal paralajmërues edhe për ekonominë europiane në tërësi, e cila tashmë po përballet me presione nga tregtia ndërkombëtare, inflacioni dhe politikat monetare të kujdesshme të ECB-së./skyweb.al
