Edhe pse vera po i afrohet fundit dhe numri i pushuesve në bregdet ka nisur të bjerë, baret dhe restorantet në zonat turistike vijojnë të përballen me mungesë të stafit. Kërkesa më e madhe është për kamarierë dhe banakierë, ndërkohë që vendet e lira të punës mbeten të shumta.
Sipas të dhënave të Agjencisë Kombëtare të Punësimit dhe Aftësive, vetëm në ditët e para të shtatorit janë shpallur mbi 21 pozicione vakante në Durrës dhe Vlorë, dy nga destinacionet më të vizituara gjatë sezonit veror. Ky numër tregon qartë hendekun mes nevojës së lartë për punonjës dhe ofertës së kufizuar në tregun e punës.
Përveç mungesës së stafit, sektorin e shërbimit e rëndon edhe fenomeni i informalitetit. Punësimi pa kontrata, deklarimi i pjesshëm i pagave dhe shmangia e detyrimeve tatimore janë problematika të përsëritura, sidomos gjatë muajve të verës kur fluksi i punës është më i madh dhe kontrollet më të vështira.
Për të frenuar këtë praktikë, Drejtoria e Tatimeve ka vendosur paga minimale të referencës për profesionet kryesore të turizmit dhe shërbimit. Udhëzimi i bërë publik në fillim të sezonit përcakton që pagat të mos jenë më të ulëta se niveli i caktuar për çdo kategori.
Kështu, paga minimale për rojet e parkimit është 55 mijë lekë, ndërsa për kamarierët varion nga 70 deri në 80 mijë lekë në muaj. Sanitarët, larësit e enëve dhe punëtorët e thjeshtë duhet të paguhen të paktën 60 mijë lekë, ndërsa menaxherët nga 90 deri në 110 mijë lekë. Më të lartë janë pagat për kuzhinierët dhe kryekuzhinierët, të cilët mund të përfitojnë deri në 140 mijë lekë.
Tatimet kanë paralajmëruar se çdo subjekt që deklaron paga më të ulëta se këto nivele do të konsiderohet me risk dhe do të përballet me kontrolle të detajuara. /Skyweb.al
