Shtimi i erëzave ose i një salce në ushqim nuk shërben vetëm për t’i dhënë shije, por edhe për të ndihmuar trupin të përthithë më mirë vitaminat dhe mineralet. Shkencëtarët besojnë se kombinimi i duhur i përbërësve mund të rrisë ndjeshëm vlerat ushqyese që marrim nga ushqimi.
Piperi i zi, një erëz e çmuar prej mijëra vitesh, nuk përdoret vetëm për aromë. Ai përmban një përbërës që ndihmon vitaminat dhe lëndët ushqyese të përthithen më lehtë në gjak, duke bllokuar mekanizmat e trupit që normalisht do t’i nxirrnin ato jashtë. Kjo e bën piperin e zi një aleat të rëndësishëm në përthithjen e vitaminave, veçanërisht kur kombinohet me ushqime të pasura me perime.
Por po aq i rëndësishëm është edhe roli i vajit. Shumë vitamina, si A, D, E dhe K, janë të tretshme në yndyrë dhe pa praninë e saj nuk përthithen nga organizmi. Studimet tregojnë se vaji i ullirit, në veçanti, ndihmon në “çlirimin” dhe transportimin e këtyre vitaminave nëpër sistemin tretës. Ai formon grimca të vogla yndyre që veprojnë si mjete transporti për vitaminat drejt qarkullimit të gjakut.
Hulumtime të fundit kanë zbuluar se perime shumë ushqyese, si lakra jeshile (kale), kur konsumohen me salcë me bazë vaj ulliri, përthithen shumë më mirë sesa kur hahen pa yndyrë. Ky efekt nuk është i njëjtë me të gjitha vajrat, pasi vaji i ullirit rezulton shumë më efektiv sesa vaji i kokosit në përthithjen e karotenoideve.
Kjo është edhe një nga arsyet pse dieta mesdhetare, e pasur me vaj ulliri, fruta dhe perime të freskëta, konsiderohet ndër më të shëndetshmet në botë. Në praktikë, një sallatë e shoqëruar me vaj ulliri dhe pak piper të zi nuk është vetëm më e shijshme, por edhe shumë më e dobishme për organizmin.
