Kompanitë e sigurimit kanë paguar gjithsej 4.8 miliardë lekë dëme në periudhën janar-korrik 2025, ku pjesa më e madhe e dëmeve të paguara bruto i përket sigurimit motorik.
Sipas të dhënave më të fundit nga Autoriteti i Mbikëqyrjes Financiare, shoqëritë e sigurimit kanë paguar rreth 3.1 miliardë lekë për rastet e aksidenteve të automjeteve që kanë pasur sigurim të përgjegjësisë motorike nga palët e treta, pra MTPL të brendshme, sigurim kufitar ose me Karton Jeshil.
Pagesat e dëmeve janë rritur me vetëm 1% krahasuar me periudhën janar – korrik 2024.
Numri i dëmeve të paguara është rritur me 2,200 duke arritur shifrën 44,504, nga të cilat 95% të dëmeve janë paguar nga shoqëritë e sigurimit të jo-Jetës dhe 5% nga shoqëritë e sigurimit të jetës.
Duke qenë se numri më i madh i kontratave dhe primeve të shkruara bruto është regjistruar për sigurimet në kategorinë e jo-jetës, edhe vlera e dëmeve të paguara është më e lartë në aktivitetin e jo-jetës.
Kështu, rreth 4.3 miliardë lekë dëme janë paguar për sigurimin motorik, të pronës dhe aktivitetet e tjera që nuk lidhen me jetën e individit, ndërkohë që vetëm 209 milionë lekë dëme janë paguar nga sigurimi i jetës.
Nga ana tjetër, dëmet pezull si sigurues i drejtpërdrejtë, pra ato që janë të papaguara akoma, që janë në proces vlerësimi ose që janë objekt i çështjeve gjyqësore, kanë pësuar rritje.
Sipas Institutit të Statistikave, në shtatë muajt e parë të vitit janë shënuar 16% më pak aksidente rrugore se në të njëjtën periudhë të 2024. Si rezultat i numrit më të ulët të aksidenteve të shkaktuara, edhe pagesat e dëmeve kanë qenë më të vogla. /tvscan
