Qeveria Rama 4, e dalë nga zgjedhjet me 83 mandate në Kuvend, ka paraqitur programin e saj qeverisës për katër vitet e ardhshme, duke shpalosur ambicie që shkojnë nga integrimi europian, te zhvillimi i turizmit dhe industrisë ushtarake.
Në qendër të planit qëndrojnë tre shtylla kryesore: “Shqipëria Europiane” me synim anëtarësimin në BE deri në vitin 2030, “Rritja e qëndrueshme ekonomike” dhe “Mirëqenie për të gjithë”.
Kryeministri Edi Rama ka shpallur synimin për ta pozicionuar vendin si një destinacion të nivelit të lartë në Mesdhe, duke ndërtuar 20 marina të reja nga Velipoja në Ksamil dhe duke ndarë territorin në gjashtë rajone turistike.
Një tjetër drejtim i fortë i programit është zhvillimi i industrisë së mbrojtjes.
Qeveria planifikon të rrisë prodhimin “Made in Albania” të municioneve, armatimit të lehtë, mjeteve të blinduara, mjeteve të emergjencave civile dhe sistemeve pa pilot, duke e kthyer industrinë ushtarake në një sektor strategjik.
Në fushën e emergjencave civile, pas kritikave për menaxhimin e zjarreve këtë verë, Rama ka paralajmëruar blerjen e dy avionëve zjarrfikës, forcimin e flotës tokësore dhe ngritjen e katër qendrave rajonale për emergjencat.
Një pjesë e rëndësishme e programit lidhet me dixhitalizimin dhe përdorimin e inteligjencës artificiale. Sistemi i drejtësisë do të integrohet me module të AI për menaxhimin e çështjeve deri në vitin 2028, ndërsa administrata publike synohet të funksionojë pa dokumente fizike.
Qeveria premton gjithashtu miratimin e një Kodi Penal dhe Civil të ri, të përafruar me standardet e BE-së.
Në fushën e transparencës dhe prokurimeve publike, qeveria planifikon të fuqizojë portalin “Transparent Albania” dhe të kalojë tek një sistem plotësisht tërësisht të automatizuar për tenderat përmes inteligjencës artificiale, duke synuar eliminimin e korrupsionit dhe ndërhyrjeve njerëzore.
Me këtë program, qeveria kërkon të kombinojë ambiciet për turizëm të nivelit të lartë dhe zhvillim ekonomik me industrinë e mbrojtjes dhe teknologjinë, duke dhënë një mesazh të dyfishtë: Shqipëria e pushimeve mesdhetare, por edhe e armatimit “Made in Albania”. /skyweb.al
