Rritja ekonomike e viteve të fundit nuk është përkthyer në përmirësim për pensionistët shqiptarë. Ekonomia u zgjerua me mbi 24% në periudhën 2021–2025, por të ardhurat reale të pensionistëve kanë rënë.
Rritja e çmimeve dhe kostove të jetesës ka zhvlerësuar fuqinë blerëse të moshës së tretë. Në këtë situatë, sipas një analize të Monitor, 27% e popullsisë në moshë pensioni po shtyhet drejt kufirit të varfërisë ekstreme.
Pensioni mesatar i pensionistëve të rinj ra vitin e kaluar në rreth 16 mijë lekë, ose 3% më pak se ata që dolën në pension në vitin 2024.
Problemi më i rëndë është te pensionet e pjesshme. Në vitin 2025, rreth 55% e 641,085 pensionistëve trajtoheshin me pension të pjesshëm.
Pagesa mesatare për këtë kategori ishte vetëm 13,500 lekë në muaj. Ndërkohë, numri i pensionistëve po rritet më shpejt se ai i kontribuuesve.
Nga viti 2021 në 2025, pensionistët u shtuan me mbi 84 mijë, ndërsa kontribuuesit me rreth 80 mijë. Raporti kontribuues-pensionist ra nga 1.42 në vitin 2021 në 1.36 në vitin 2025. Kjo e bën skemën më të brishtë financiarisht dhe rrit presionin mbi buxhetin.
Shkalla e zëvendësimit, pra raporti mes pensionit dhe pagës mesatare, ra në 30%, nga 38% në vitin 2021.
Në praktikë, pensionistët po marrin gjithnjë e më pak krahasuar me të ardhurat e pjesës tjetër të shoqërisë, ndërsa shpenzimet për ushqime, ilaçe dhe shërbime bazë janë rritur.
