Rritja e fortë e fluksit turistik në Shqipëri ka shtuar presionin edhe mbi shërbimet publike, përfshirë sistemin shëndetësor.
Gjatë sezonit veror, urgjencat, qendrat shëndetësore dhe spitalet përballen jo vetëm me pacientë vendas, por edhe me turistë të huaj që kanë nevojë për ndihmë mjekësore.
Rastet variojnë nga problemet e lehta shëndetësore deri te ndërhyrjet më të specializuara.
Për këtë arsye, këtë sezon është vendosur një sistem tarifash për shtetasit e huaj që marrin shërbim në institucionet shëndetësore publike.
Masa është pjesë e një kuadri të ri, të prezantuar më herët nga Ministria e Shëndetësisë, për mënyrën si regjistrohen, trajtohen, tarifohen dhe dokumentohen shërbimet ndaj shtetasve të huaj.
Në qershor, ministrja Evis Sala deklaroi se ky urdhër vendos për herë të parë rregulla të unifikuara për shërbimet shëndetësore që u ofrohen turistëve dhe shtetasve të huaj në institucionet publike.
“Ky urdhër vendos për herë të parë një kuadër të unifikuar për regjistrimin, trajtimin, tarifimin dhe dokumentimin e shërbimeve shëndetësore të ofruara për shtetasit e huaj në institucionet shëndetësore publike”, deklaroi ministrja Sala.
Kuadri i ri përcakton kategoritë e të huajve që përfitojnë shërbime falas, rregullat e tarifimit për shtetasit jo-rezidentë dhe procedurat për rastet që mbulohen nga marrëveshjet ndërkombëtare.
Institucionet shëndetësore publike kanë detyrim të publikojnë paraprakisht tarifat, të informojnë pacientin për koston e trajtimit dhe të lëshojnë dokumentacionin financiar përkatës.
Sistemi synon të shmangë paqartësitë në pagesa dhe të vendosë trajtim të njëjtë për të gjithë shtetasit e huaj që kërkojnë shërbim në spitalet publike.
Të ardhurat nga tarifat pritet të përdoren për përmirësimin e cilësisë së shërbimeve dhe forcimin e kapaciteteve të institucioneve shëndetësore.
Vendosja e tarifave vjen në një periudhë kur turizmi po rrit ndjeshëm kërkesën për shërbime në zonat bregdetare dhe qytetet me fluks të lartë vizitorësh.
Turistët e huaj që i drejtohen spitaleve apo qendrave shëndetësore publike do të trajtohen sipas rregullave të reja të tarifimit, ndërsa shërbimet falas do të aplikohen vetëm për kategoritë e përcaktuara në kuadër ligjor. /skyweb.al
