Policia e Shtetit ka ngritur alarmin për shtimin e rasteve të mashtrimeve online që prezantohen si mundësi investimi fitimprurëse, veçanërisht në fushën e kriptomonedhave dhe skemave piramidale. Përmes një njoftimi zyrtar, autoritetet paralajmërojnë qytetarët që të jenë të kujdesshëm dhe të mos bien pre e këtyre skemave të rrezikshme.
Aktualisht, Drejtoria për Hetimin e Krimeve Kibernetike, në bashkëpunim me Policinë dhe Prokurorinë e Rrethit Gjyqësor Fier, po vijon hetimet në kuadër të operacionit “XUEX”. Ky operacion synon zbardhjen e plotë të aktivitetit kriminal të individëve dhe grupeve që kanë organizuar dhe promovuar platforma mashtruese investimi në internet.
Sipas Policisë, hetimet janë të fokusuara edhe në gjurmimin dhe dokumentimin e transaksioneve me kriptovaluta që janë përdorur në këto aktivitete, si pjesë e skemave mashtruese.
Megjithë përpjekjet për goditjen e këtyre rrjeteve kriminale, autoritetet theksojnë se grupet e organizuara po përshtatin strategjitë e tyre, duke përdorur metoda gjithnjë e më të sofistikuara për të mashtruar qytetarët. Një nga format më të përhapura së fundmi është ofrimi i “kurseve falas” për kriptovalutat, përmes platformave si Viber, Telegram dhe aplikacione të ngjashme. Qëllimi kryesor i këtyre kurseve është krijimi i besimit tek viktimat e mundshme, për t’i nxitur më pas të investojnë në platforma fiktive.
Uniformat blu thejksojnë se kanë identifikuar disa nga këto platforma, përfshirë “Xuex”, “Txex” dhe të tjera me funksionim të ngjashëm, dhe fton qytetarët që mund të jenë dëmtuar financiarisht nga këto skema, të paraqiten pranë Drejtorisë për Hetimin e Krimeve Kibernetike, ose në sektorët përkatës në drejtoritë vendore të Policisë, për të denoncuar rastet.
“Denoncimet e qytetarëve janë thelbësore për zbardhjen dhe dokumentimin e plotë të këtyre veprimtarive kriminale, si dhe për mbrojtjen e qytetarëve të tjerë nga rënia në kurthin e mashtrimeve të ngjashme”, theksohet në deklaratën e Policisë së Shtetit. /Skyweb.al
