Një situatë e pazakontë ka ndodhur në aeroportin Napoleon Bonaparte në Ajaccio, Francë, ku një avion i linjës Air Corsica u detyrua të qëndronte në ajër për afro një orë për një arsye krejt të papritur, kontrollori i vetëm i fluturimeve ishte në gjumë.
Ngjarja ka ndodhur pak pas mesnatës të së martës, kur avioni Airbus A320, që vinte nga Parisi me një orë vonesë, mbërriti mbi aeroport. Në vend që të merrte udhëzime për ulje, pilotët u përballën me një pistë të errët dhe asnjë përgjigje nga kulla e kontrollit. Të shqetësuar nga mungesa e komunikimit, ata nisën të bëjnë lëvizje në ajër mbi Gjirin e Ajaccios dhe kërkuan ndihmë nga qendrat rajonale të kontrollit ajror.
Sipas të përditshmes lokale Corse Matin, rezultoi se në turn ishte vetëm një kontrollor, i cili duhej të priste avionin, por e kishte zënë gjumi. Përpjekjet e ekipit për të kontaktuar me të dështuan, çka çoi në njoftimin e xhandarmërisë. Megjithëse hyrja në kullën e kontrollit u vonua për shkak të protokolleve të sigurisë, më në fund kontrollori u gjet në zyrën e tij, duke fjetur.
Pasi u zgjua, ai ndezi dritat e pistës dhe dha leje për uljen e avionit. Fatmirësisht, situata u menaxhua pa pasoja për pasagjerët, të cilët, sipas kapitenit të fluturimit, e morën ngjarjen me sportivitet.
Kontrollori i turnit iu nënshtrua menjëherë testeve për prani të substancave narkotike apo alkoolit, por rezultoi i pastër. Megjithatë, rasti ka nxitur një debat të nxehtë në Francë, ku sindikatat e kontrollorëve të fluturimeve kanë paralajmëruar prej kohësh për mungesë personeli, orare të gjata pune dhe kushte të vështira që çojnë në lodhje të madhe, faktorë që përbëjnë rrezik serioz për sigurinë ajrore.
Ky incident ka rikthyer vëmendjen mbi nevojën për reforma të thella në sistemin e kontrollit ajror, për të shmangur përsëritjen e situatave të tilla potencialisht të rrezikshme. /Skyweb.al
