Tregtia online po fiton gjithnjë e më shumë terren edhe në Shqipëri. Sipas të dhënave më të fundit të publikuara nga INSTAT, gjatë vitit 2025, 10.1% e totalit të xhiros tregtare në vend është realizuar përmes shitjeve dhe blerjeve online, një rritje prej 0.6% krahasuar me vitin 2024.
Ndërmarrjet që veprojnë në fushën e tregtisë me shumicë dhe pakicë kryesojnë në këtë drejtim, duke kontribuar me 46.1% të xhiros së tregtisë online, ndërsa sektori i Informacionit dhe Komunikimit zë 16.5%.
Gjithashtu, INSTAT raporton se përdorimi i platformave dixhitale nga bizneset është në rritje të vazhdueshme. Gjatë vitit 2025, 28% e ndërmarrjeve në Shqipëri kanë shitur produkte apo shërbime përmes faqeve të internetit, aplikacioneve të dedikuara ose platformave të tjera të tregtisë elektronike. Kjo përfaqëson një rritje prej 3.5% në krahasim me një vit më parë.
Sipas sektorëve, aktivitetet e Akomodimit dhe Shërbimit Ushqimor kanë pjesën më të madhe të përfshirjes në tregtinë online me 48.2%, të ndjekura nga shërbimet Profesionale, Shkencore dhe Teknike me 44.8%, si dhe sektori i Informacionit dhe Komunikimit me 43.3%. /Skyweb.al
