Administrata Tatimore ka publikuar një sqarim lidhur me mënyrën se si duhet të deklarohen të ardhurat nga dhënia me qira ditore e apartamenteve apo vilave përmes platformave online si Airbnb dhe Booking.
Sipas këtij njoftimi, individët që japin pronat e tyre me qira ditore nuk kanë detyrim të hapin NIPT nëse nuk ushtrojnë një aktivitet tjetër tregtar, por janë të detyruar të deklarojnë të ardhurat përmes Deklaratës Vjetore Individuale të të Ardhurave (DIVA) dhe të paguajnë 15% tatim mbi to.
Tatimet theksojnë se kur qiramarrësi është një subjekt i regjistruar, detyrimin për mbajtjen dhe pagesën e tatimit e ka vetë subjekti.
Por në rastet kur qiramarrësi është një individ i paregjistruar, siç ndodh zakonisht me turistët vendas apo të huaj, atëherë përgjegjësia i takon pronarit, i cili duhet të deklarojë dhe të paguajë tatimin brenda datës 20 të muajit pasardhës.
Deklarimi kryhet vetëm në mënyrë elektronike përmes portalit zyrtar tatime.gov.al, ku individët duhet të regjistrohen paraprakisht pranë zyrës së Shërbimit të Tatimpaguesve për t’u pajisur me fjalëkalim. Në deklaratë pasqyrohet shuma e të ardhurave nga qiratë dhe tatimi i llogaritur në masën 15%. Pas dorëzimit, gjenerohet edhe urdhri i pagesës për kryerjen e detyrimit në bankë.
Administrata Tatimore ka paralajmëruar gjithashtu se verifikimi i vetëdeklarimeve është pjesë e kontrolleve të rregullta dhe në rast se të ardhurat nuk deklarohen, do të ndërmerren masa ndëshkuese.
Në vitin 2024, sipas të dhënave të AirDNA, mbi 21 mijë apartamente, vila dhe shtëpi ishin të listuara në Shqipëri vetëm në platformën Airbnb, duke gjeneruar rreth 85 milionë euro të ardhura. Megjithatë, një pjesë e konsiderueshme e tyre vijon të funksionojë jashtë sistemit formal, çka ka nxitur autoritetet të forcojnë evidentimin dhe fiskalizimin e qirave ditore.
Tatimet kujtojnë se dhënia me qira e pronës si njësi të mirëfillta akomodimi (bed & breakfast, hotele të vogla) përbën aktivitet tregtar, i cili kërkon regjistrim pranë Qendrës Kombëtare të Biznesit dhe hapjen e NIPT-it.
Institucioni nënvizon se përmbushja vullnetare e detyrimeve ligjore është jo vetëm një detyrim ligjor, por edhe një akt qytetar për forcimin e shtetit ligjor. /skyweb.al
