Mercedes-Benz ka njoftuar zhvendosjen e një pjese të linjës së saj të prodhimit nga Berlini drejt Jawor-it në Poloni, si rrjedhojë e kostove gjithnjë e më të larta të punës në Gjermani dhe konkurrencës së ashpër nga prodhuesit kinezë. Kompania do të transferojë prodhimin e furgonit elektrik e-Sprinter në Jawor, ku Mercedes ka ngritur që prej vitit 2019 fabrika për motorë hibridë dhe bateri.
Ky vendim përforcon strategjinë e gjigantit gjerman për të fuqizuar portofolin e tij të automjeteve elektrike në qendra prodhimi më të leverdisshme.
Investimi prej 360 milionë eurosh (1.528 miliardë PLN) pritet të krijojë mbi 300 vende pune të reja, përfshirë rreth 30 pozicione për inxhinierë të kualifikuar.
Ky hap e konsolidon Poloninë si një fuqi të re të industrisë automobilistike në Evropë, duke qenë tashmë prodhuesi i dytë më i madh i baterive për makinar elektrike në kontinent dhe me kosto pune pothuajse pesë herë më të ulëta se ato gjermane.
Në Gjermani, lajmi ka shkaktuar reagime të forta, sidomos në Ludwigsfelde, ku mbi 2.200 punëtorë shprehin frikën e humbjes së vendeve të punës.
Sindikatat dhe zyrtarët lokalë kanë paralajmëruar protesta, duke e cilësuar këtë vendim si një goditje për punëtorët gjermanë.
Megjithatë, zhvendosja e Mercedes-Benz pasqyron një trend më të gjerë të industrisë automobilistike evropiane, ku gjithnjë e më shumë prodhues po diversifikojnë prodhimin në Evropën Lindore.
Polonia po shfaqet si një qendër e fuqishme për investime globale dhe inovacion në teknologjitë e gjelbra, duke tërhequr gjigantë të industrisë në kërkim të një avantazhi afatgjatë në tregun e automjeteve elektrike. /skyweb.al
