Një pjesë e madhe e punonjësve shqiptarë po mendojnë largimin nga vendi i punës aktual, duke sinjalizuar pakënaqësi të thellë në tregun e punës.
Sipas raportit më të fundit të Gallup “State of the Global Workplace 2025”, 36% e shqiptarëve po kërkojnë aktivisht mundësi të reja profesionale, duke e renditur Shqipërinë në vendin e 8-të në Europë dhe Azinë Qendrore për këtë tregues. Pas saj mbeten vende si Norvegjia, Suedia dhe Serbia.
Edhe pse shifra është më e ulët se një vit më parë (42%), ajo mbetet një tregues i fortë i pasigurisë dhe pakënaqësisë. Sipas ekspertëve, pagat e ulëta, kushtet e pamjaftueshme të punës, mungesa e sigurisë dhe emigracioni ekonomikjanë faktorët kryesorë që i shtyjnë shqiptarët të kërkojnë alternativa.
Raporti i Gallup thekson se dëshira për të ndryshuar punë lidhet ngushtë me nivelin e lartë të stresit, mungesën e angazhimit dhe mirëqenien e ulët në vendin e punës. Në Shqipëri, këto sfida janë të dukshme sidomos tek profesionistët e rinj dhe të kualifikuar, të cilët shpesh e shohin emigrimin si zgjidhjen më të arsyeshme.
Analistët paralajmërojnë se, nëse nuk adresohen këto probleme, vendi rrezikon një largim masiv të trurit të kualifikuar, duke ndikuar negativisht jo vetëm në zhvillimin ekonomik, por edhe në aftësinë e Shqipërisë për të tërhequr investime të huaja, raporton Monitor.al.
Punëdhënësit shqiptarë, sipas raportit, përballen me sfidën për të rritur pagat, përmirësuar kushtet e punës dhe investuar në mirëqenien e punonjësve, nëse duan të ruajnë talentin brenda vendit.
Ndërkohë, Gallup vë në dukje rëndësinë e një mjedisi pune mbështetës, ku drejtuesit ofrojnë motivim dhe mundësi zhvillimi profesional. Përndryshe, fenomeni i largimit të punonjësve do të vijojë të thellohet, duke e bërë Shqipërinë gjithnjë e më të brishtë ndaj emigracionit të fuqisë punëtore.
