Qeveria shqiptare po përgatit një falje të gjerë të borxheve tatimore në kuadër të një nisme të re të quajtur “Paqja Fiskale”. Sipas të dhënave zyrtare, rreth 213 mijë tatimpagues do të përfitojnë nga kjo amnisti, me një total prej 335 milionë euro borxhe që do të fshihen plotësisht, për aq kohë sa i përkasin më shumë se 10 viteve më parë.
Borxhet që do të falen përfshijnë taksa të papaguara, gjoba dhe kamatëvonesa, kryesisht të krijuara përpara vitit 2016. Sipas Ministrisë së Financave, kjo nismë synon të lehtësojë subjektet që prej vitesh mbartin detyrime që nuk kanë mundur t’i shlyejnë, si dhe të pastrojë bilancet e shtetit nga borxhet e pambledhshme.
Përveç faljes së plotë për borxhet mbi 10-vjeçare, qeveria parashikon edhe lehtësira për detyrimet e krijuara në periudhën 5-10 vite më parë. Nëse subjektet zgjedhin të paguajnë detyrimet bazë, do t’u falen gjobat dhe interesat. Ndërkohë, për borxhet më të reja se 5 vite, lehtësimi do të jetë i pjesshëm.
Sipas të dhënave zyrtare, totali i detyrimeve tatimore të papaguara në vend kap vlerën e 1.7 miliardë eurove, ndërsa pjesa më e madhe e tyre janë të klasifikuara si “të pambledhshme”. Nisma pritet të hyjë në fuqi në fillim të vitit 2026 dhe është pjesë e përpjekjeve të qeverisë për të përmirësuar marrëdhënien me biznesin dhe për të nxitur formalizimin. /Skyweb.al
