Pentagoni është alarmuar nga niveli i ulët i stokut të armëve që Shtetet e Bashkuara do të kishin në dispozicion në rast të një konflikti të mundshëm me Kinën dhe ka urdhëruar furnitorët e raketave të dyfishojnë apo edhe të katërfishojnë ritmet e prodhimit.
Sipas Wall Street Journal, drejtuesit ushtarakë amerikanë po i kërkojnë industrisë së mbrojtjes të rrisë prodhimin e 12 sistemeve kritike të raketave në një afat rekord. Ky presion vjen në një kohë kur rritja e tensioneve në rajonin e Paqësorit ka vënë në qendër të vëmendjes kapacitetin e SHBA-ve për të përballuar një përplasje të mundshme të zgjatur me Pekinin.
Prodhuesit amerikanë të armatimit kanë paralajmëruar se rritja e menjëhershme e kapaciteteve kërkon investime të mëdha, shtim të fuqisë punëtore dhe siguri për kontrata afatgjata. Megjithatë, Pentagoni duket i vendosur të garantojë që arsenali i tij të mos mbetet i pamjaftueshëm në një skenar përballjeje me Kinën. /skyweb.al
