Instituti i Statistikave (INSTAT) publikoi të dhënat më të fundit mbi ecurinë e ekonomisë shqiptare, duke bërë të ditur se Prodhimi i Brendshëm Bruto u rrit me 3,71% në tremujorin e parë të vitit 2026, krahasuar me të njëjtën periudhë të një viti më parë.
Sipas INSTAT, pas rishikimit të llogarive vjetore, norma e rritjes ekonomike për tremujorin e parë të vitit 2025 u korrigjua në 3,76%, nga 3,83% që ishte vlerësimi i mëparshëm.
Kontributin më të madh në rritjen ekonomike e dhanë sektorët e administratës publike, arsimit dhe shëndetësisë, me 1,68 pikë përqindje. Rritja u mbështet gjithashtu nga pasuritë e paluajtshme (+0,52 pikë përqindje), aktivitetet profesionale dhe shërbimet administrative (+0,47), ndërtimi (+0,32), si dhe tregtia, transporti, akomodimi dhe shërbimi ushqimor (+0,21). Kontribut pozitiv dhanë edhe aktivitetet financiare, të sigurimit, informacionit dhe komunikacionit.
Në anën tjetër, sektorët e industrisë, energjisë dhe ujit ndikuan negativisht në rritjen ekonomike me -0,25 pikë përqindje, ndërsa arti, argëtimi dhe aktivitetet e tjera të shërbimit kontribuan me -0,07 pikë përqindje dhe bujqësia, pyjet dhe peshkimi me -0,06 pikë përqindje.
Të dhënat tregojnë gjithashtu se gjatë tremujorit të parë të vitit 2026, konsumi final i popullatës u rrit me 3,94%, ndërsa konsumi final i qeverisë u ul me 1,36%.
Në sektorin e tregtisë së jashtme, eksportet e mallrave dhe shërbimeve shënuan një rritje prej 9,36%, ndërsa importet u rritën me 7,39%.
INSTAT publikoi edhe të dhënat përfundimtare për PBB-në e vitit 2024 dhe ato gjysmëfinale për vitin 2025. Sipas tyre, PBB-ja me çmime korrente arriti në 2.648.505 milionë lekë në vitin 2025, nga 2.517.280 milionë lekë një vit më parë.
Në tërësi, ekonomia shqiptare u rrit me 3,66% gjatë vitit 2025, krahasuar me 4,03% në vitin 2024.
Për sa i përket strukturës së ekonomisë, sektori i shërbimeve vijon të ketë peshën më të madhe në PBB me 49,10%, duke regjistruar një rritje reale prej 5,83%. Ndërtimi zë 12,56% të PBB-së dhe u rrit me 4,11%, ndërsa industria përbën 10,08% të ekonomisë dhe shënoi një tkurrje prej 3,72%. Sektori i bujqësisë, pyjeve dhe peshkimit, që përfaqëson 14,59% të PBB-së, u tkurr me 2,50% në terma realë. /skyweb.al
