Instituti i Statistikave publikoi të dhënat për Produktin e Brendshëm Bruto (PBB) në tremujorin e dytë të vitit 2025, sipas të cilave ekonomia shqiptare u rrit me 3,51% në terma realë krahasuar me të njëjtën periudhë të vitit të kaluar.
Të dhënat tregojnë se motori kryesor i rritjes ka qenë sektori i administratës publike, arsimit dhe shëndetësisë, ndërkohë që bujqësia, një nga sektorët më problematikë vitet e fundit, ka shënuar sërish rënie.
Sipas INSTAT, grupi “Administrata publike, Arsimi dhe Shëndetësia” dha kontributin më të lartë në rritjen e PBB-së, me +1,65 pikë përqindje, duke shënuar një rritje prej 15,11% krahasuar me vitin 2024.
Ky është sektori që ka mbajtur peshën më të madhe në përshpejtimin e ekonomisë, i ndjekur nga tregtia, transporti, akomodimi dhe shërbimi ushqimor me +0,47 pikë përqindje dhe aktivitetet e pasurive të paluajtshme me +0,37 pikë përqindje. Ndërtimi kontribuoi gjithashtu me +0,30 pikë përqindje, duke reflektuar gjallërinë në sektorin e investimeve infrastrukturore.
Bujqësia në rënie të vazhdueshme
Në krahun tjetër, sektori i “Bujqësisë, Pyjeve dhe Peshkimit” vijon të tërheqë poshtë ekonominë, duke kontribuar negativisht me -0,46 pikë përqindje.
Aktiviteti shënoi një rënie prej 2,49% krahasuar me të njëjtin tremujor të vitit të kaluar, duke konfirmuar vështirësitë strukturore dhe mungesën e investimeve efektive në këtë fushë.
Po ashtu, “Industria, Energjia dhe Uji” shënuan një tkurrje me 1,79%, duke dhënë një kontribut negativ prej -0,18 pikë përqindje.
Taksat dhe konsumi mbështesin rritjen
“Taksat Neto mbi produktet” dhanë një kontribut pozitiv prej +0,87 pikë përqindje, duke u rritur me 6,53%.
Nga ana e shpenzimeve, konsumi final i popullatës u rrit me 3,88%, ndërsa konsumi final i qeverisë shënoi një rritje të fortë me 12,44%, duke reflektuar rolin gjithnjë e më të madh të shtetit në nxitjen e rritjes ekonomike.
Formimi bruto i kapitalit fiks u rrit me 4,33%, ndërkohë që eksportet e mallrave dhe shërbimeve u rritën me vetëm 0,97%, përballë një rritjeje më të fortë të importeve me 3,26%.
Një ekonomi e udhëhequr nga shteti
Të dhënat e INSTAT nxjerrin në pah kontrastin mes sektorëve. Rritja e ekonomisë shqiptare në tremujorin e dytë është mbështetur gjerësisht te shteti dhe shpenzimet publike, ndërkohë që bujqësia dhe industria, dy sektorë bazë për zhvillimin e qëndrueshëm, vazhdojnë të tkurren.
Ky orientim nënvizon varësinë në rritje të ekonomisë nga administrata dhe shpenzimet e qeverisë, duke lënë pas dore sektorët prodhues që mund të sigurojnë stabilitet afatgjatë.
