Kompania italiane Terna njoftoi se është në diskutime me Operatorin shqiptar të Sistemit të Transmetimit, për ndërtimin e linjës nënujore të transmetimit të energjisë mes Shqipërisë dhe Italisë.
Lidhur me këtë linjë kompania vlerësoi se do të fillojë në vitin 2029 dhe qëllimi i projektit është integrimi i tregut shqiptar në tregun evropian të energjisë.
Aktualisht, sistemi shqiptar i transmetimit të energjisë elektrike është i ndërlidhur me sistemet e Kosovës, Malit të Zi dhe Greqisë, përmes gjashtë linjave ndërkufitare të transmetimit të energjisë, ndërsa ndërlidhja me Maqedoninë e Veriut është në proces.
Duhet të theksohet se linja nënujore Shqipëri-Itali është pjesë e Korridorit 8, i cili lidh Evropën me Bullgarinë nëpërmjet Shqipërisë dhe Maqedonisë së Veriut. Ndërlidhja Itali-Shqipëri do të ndjekë rrjetet rrugore dhe hekurudhore dhe, duke filluar nga Bari dhe Brindisi në Itali, do të vazhdojë drejt Vlorës dhe Durresit, pastaj drejt Elbasanit, nëpërmjet Qafë Thanës, ku do të bëhet lidhja me Maqedoninë e Veriut, duke përfunduar në Varna dhe Burgas në Bullgari.
Hapat e parë drejt ndërtimit të kabllit nënujor Itali-Shqipëri u hodhën në vitin 2007, ndërsa projekti u rikthye në plan të parë në vitin 2023, kur Operatori i Sistemit të Transmetimit të Shqipërisë (OST) dhe Operatori i Sistemit të Transmetimit të Italisë (TERNA) ranë dakord të fillonin përgatitjen e studimit të fizibilitetit teknik dhe ekonomik për projektin.
Në dhjetor 2023, u njoftua pjesëmarrja e Emirateve të Bashkuara Arabe në projekt, pas një marrëveshjeje me Italinë, ndërsa në gusht 2024, u mbajt një takim i përfaqësuesve të menaxherëve të transmetimit të të dy vendeve, gjatë të cilit u nënvizua rëndësia e madhe e linjave të ndërlidhjes, jo vetëm nga një perspektivë energjetike, por edhe gjeopolitike. /Kapitali
