Fushata për zgjedhjet parlamentare të 11 majit nis sot zyrtarisht, por debati politik ka marrë një ngjyrim krejt të veçantë që në prag: në vend të sloganeve klasike, këtë herë simbolikat e kafshëve kanë hyrë fuqishëm në retorikën elektorale.
Kryeministri Edi Rama, në një dalje publike, e ka etiketuar rivalin e tij historik Sali Berisha si “bufin e kënetës”, një metaforë e ashpër që ka bërë xhiron e rrjeteve sociale. Por përgjigjja e demokratëve nuk ka vonuar: llogaria zyrtare e La Civita-s, një prej figurave mediatike që mbështet opozitën, publikoi një video në Twitter me mesazhin “Bufi e ha miun”, shoqëruar me pamje të një buf që kap dhe ha një mi.
Në këtë mënyrë, beteja politike është kthyer në përplasje simbolike: njëra palë përdor bufin për të portretizuar kundërshtarin si simbol të errësirës e izolimit, ndërsa pala tjetër i kthen përgjigje me idenë e forcës dhe fitores përmes të njëjtës figurë.
Ndërkohë, partitë po përgatiten për nisjen e fushatave elektorale në terren. Partia Demokratike dhe Aleanca për Shqipërinë Madhështore do të hapin fushatën sot në orën 19:00 në sheshin “Nënë Tereza”. Partia Socialiste do të mbledhë mbështetësit e saj më 12 prill, në orën 12:00, në sheshin “Skënderbej”, një datë që sipas kryeministrit përfaqëson 12 yjet e flamurit të BE dhe synimin për integrim europian.
“Koalicioni Euroatlantik”, nën drejtimin e Lulzim Bashës, ka planifikuar hapjen e fushatës po më 12 prill, në orën 11:00, në një ambient privat pranë kryeqytetit. Të njëjtën ditë, në orën 18:00, nis zyrtarisht fushatën edhe nisma “Shqipëria Bëhet”, në qytetin e Vlorës.
Partia “Mundësia” hap fushatën të dielën, më 13 prill në orën 17:00, në Pallatin e Kongreseve, ndërsa “Lëvizja Bashkë” e Arlind Qorit nis zyrtarisht mëngjesin e 13 prillit, në Fier, në orën 10:30 te Teatri “Bylis”.
Zgjedhjet e këtij viti shënojnë një risi të rëndësishme: për herë të parë, diaspora do të votojë. Janë regjistruar zyrtarisht 245,935 shqiptarë që jetojnë jashtë vendit, kryesisht në Itali, Greqi dhe Gjermani. Brenda vendit, numri i zgjedhësve është 3,713,761, përfshirë 114,642 qytetarë që votojnë për herë të parë dhe 1,081 që nuk përfshihen në lista për shkak të dekriminalizimit.
Fushata sapo ka nisur, por me bufin dhe miun që tashmë janë kthyer në protagonistë të narrativës politike, duket se gara e 11 majit do të jetë gjithçka, përveçse e zakonshme. /skyweb.al
