Një studim i fundit nga Universiteti i Sidnejt ka hedhur dritë mbi një aspekt shpesh të nënvlerësuar të dhunës në familje, ndikimin e thellë dhe afatgjatë që ajo ka mbi gjendjen financiare dhe perspektivat arsimore të grave. Të dhënat tregojnë qartë se dhuna nuk ndalet vetëm tek dëmtimi fizik apo emocional ajo ndikon drejtpërdrejt në mundësitë që gratë kanë për të ndërtuar një jetë të pavarur ekonomikisht.
Sipas studimit, gratë që kanë përjetuar forma të ndryshme dhune në marrëdhëniet e tyre, përfshirë dhunën fizike, emocionale, seksuale apo ekonomike, kanë shumë më pak gjasa të marrin pjesë në tregun e punës. Konkretisht, në vitet 2021–2022, pjesëmarrja në punë për këto gra ishte 5.3 përqind më e ulët krahasuar me ato që nuk kanë përjetuar dhunë. Kjo përqindje rritet ndjeshëm në rastet kur bëhet fjalë për abuzim ekonomik, ku hendeku në punësim arrin në 9.4%.
Situata është edhe më shqetësuese për gratë me aftësi të kufizuara, të cilat përballen me shumëfish më tepër vështirësi. Në rastin e tyre, dhuna ekonomike çon në një diferencë drastike në mundësitë për punësim, me një hendek prej 13.4% në krahasim me gratë me aftësi të kufizuara që nuk kanë qenë viktima të abuzimit.
Përtej ndikimit në tregun e punës, dhuna ka pasoja të rënda edhe në aspektin arsimor. Sipas të dhënave, gratë që përjetojnë dhunë kanë 15% më pak gjasa të përfundojnë një diplomë universitare, krahasuar me bashkëmoshataret e tyre. Edhe pas tre vitesh nga përjetimi i dhunës, ndikimi nuk shuhet: gjasat për të mbaruar universitetin bien me gati 10%.
Studimi vëren gjithashtu se shpesh, burrat që ushtrojnë dhunë përdorin metoda sistematike për të penguar gratë të punojnë apo të arsimohen. Nga fshehja e çelësave të makinës, dëmtimi i mjeteve të punës, e deri tek sabotimi i intervistave për punë ose mbikëqyrja e kontakteve të tyre nëpërmjet teknologjisë, kontrolli ekonomik dhe social bëhet një armë e heshtur, por shumë efektive për t’i mbajtur gratë në varësi të plotë.
Dhuna në familje nuk është vetëm një çështje private, ajo është një problem shoqëror me pasoja të gjera, që dëmton jo vetëm gratë, por edhe ekonominë, zhvillimin dhe drejtësinë sociale në tërësi. /Skyweb.al
