Gati një në katër mjete që i janë nënshtruar kontrollit teknik gjatë këtij viti nuk e ka kaluar testin në provën e parë, duke treguar nivelin e lartë të amortizimit dhe problemet serioze të sigurisë në rrugë.
Sipas të dhënave zyrtare të Drejtorisë së Përgjithshme të Shërbimeve të Transportit Rrugor, në 9 muajt e parë të vitit janë kontrolluar mbi 232 mijë mjete, nga të cilat 56,229 kanë ngelur ose janë refuzuar në testim.
Kjo përbën rreth 24.2% të totalit, duke reflektuar një flotë të vjetëruar që kërkon mirëmbajtje të vazhdueshme.
Problemet më të shpeshta lidhen me 37.6% mangësi në sistemin e shkarkimit të gazrave, 34.4% defekte vizuale dhe funksionale, 14.8% në sistemin e frenimit dhe 13.2% në drejtim, tregues që flasin për mungesë të standardeve teknike dhe të sigurisë.
Nga mjetet e ngelura, 50,735 janë ritestuar pas riparimit, ndërsa 5,325 priten të paraqiten sërish për kontroll. Për 239 mjete, defektet janë konsideruar të papranueshme, si xhama të dëmtuar, goma të tejkonsumuara apo mungesë dokumentacioni.
Ndërkohë, si pjesë e procesit të pastrimit të flotës nga mjetet e padobishme dhe ndotëse, mbi 6,128 mjete të vjetra janë çregjistruar përfundimisht gjatë këtij viti. Sipas DPSHTRR, ky hap synon të rrisë sigurinë rrugore dhe të ulë ndotjen mjedisore, në një kohë kur pjesa më e madhe e mjeteve që qarkullojnë në vend kanë një moshë mbi 15 vjet. /skyweb.al
