Koka e dushit dhe tubacionet që çojnë ujë në të janë vendi ideal ku bakteret mund të zhvillohen he shumohen.
Kur shumica prej nesh futemi në dush, presim që të dalim të pastër. Kjo duket e natyrshme, ujë i ngrohtë, avull dhe sapun duhet të na bëjnë të ndjehemi të freskët dhe me aromë të mirë. Por gjëja e fundit që do të prisnim është që në fillim të dushit, në momentin që hapim ujin, të dalë një shpërthim bakteri që na godet fytyrën. Por pikërisht kjo ndodh, shkruan BBC.
Brenda një metër të fundit të tubacionit të dushit, krijohet një ekosistem mikroskopik që pret momentin që të hapësh ujin. Kjo do të thotë që shpërthimi i parë i ujit nga dushi nuk është vetëm ujë dhe avull, por edhe një përzierje mikroorganizmash. Gjatë natës, një shtresë bakteresh grumbullohet në brendësi të tubit dhe kokës së dushit. Disa prej këtyre mikrobeve ngjiten në pikëzat e ujit që krijon dushi. Shumica janë të padëmshme, por llojet që zhvillohen varen nga materiali i tubit dhe sa shpesh e përdorim dushin dhe këtu mund të ketë surpriza.
Koka dhe tubat e dushit janë vend ideal për bakteret. Pas përdorimit, tubi mbetet i ngrohtë, i lagësht dhe i pa prekur për orë të tëra. Tubi i gjatë dhe i ngushtë ofron sipërfaqe të përshtatshme për mikrobet që të bashkohen dhe shumohen. Bakteret ushqehen me lëndë të tretura në ujë, si edhe me pak karbon që lëshohet nga plastika e tubit. Nëse e lëmë të qëndrojë i pandryshuar gjatë natës, mikrobet krijojnë biofilma. Kur hapim ujin, fragmente të këtyre biofilmeve shkëputen dhe përhapen në ujë.
Por sa baktere mund të ketë? Në teste të bëra në laboratorë dhe në shtëpi reale, numri i baktereve në tubat e dushit mund të arrijë deri në qindra miliona në çdo centimetër katror. Shumica janë të padëmshme, por disa grupe përfshijnë mikobaktere, një grup i madh mikroorganizmash që përfshin lloje të padëmshme nga toka, por edhe sëmundje serioze si tuberkulozi dhe lepra. Gjithashtu, kërkuesit që studiuan tubat e dushit në Britaninë e Madhe zbuluan ADN të kërpudhave si Exophiala, Fusarium dhe Malassezia, organizma që gjenden në lëkurën tonë dhe në tokë, por që ndonjëherë mund të shkaktojnë infeksione. /Skyweb.al
