Puna në administratën shtetërore po bëhet gjithnjë e më tërheqëse për qytetarët. Sipas të dhënave zyrtare të Institutit të Statistikave, në mars u raportua se pagat në sektorin publik janë rreth 30% më të larta se në sektorin privat, duke e thelluar diferencën gjatë vitit të fundit.
Raporti Vjetor 2025 i Departamentit të Administratës Publike (DAP) konfirmon rritjen e interesit për t’u punësuar në shërbimin civil. Në të njëjtën kohë, është vënë re ulje e numrit të dorëheqjeve dhe largimeve nga administrata.
Gjatë vitit 2025, mesatarja e aplikantëve për një vend pune arriti në 20, nga 17.55 që ishte një vit më parë. Për vendet në shërbimin civil, konkurrenca u rrit edhe më shumë, me 23.4 aplikantë për çdo pozicion, krahasuar me 20.3 në vitin 2024.
Ndërkohë, dorëheqjet ranë me 19.3%, nga 140 raste në 113, ndërsa largimet totale nga sistemi u ulën me 32.8%, nga 396 në 266.
Sipas DAP, kjo prirje lidhet me përmirësimin e proceseve të rekrutimit dhe rritjen e transparencës, përmes thjeshtimit të procedurave, përdorimit të portalit online për aplikime, si dhe shpërndarjes së materialeve informuese dhe pjesëmarrjes në panaire pune.
Një faktor i rëndësishëm ka qenë edhe reforma e pagave e zbatuar gjatë vitit 2025, e cila përfshiu rritjen e pagave për administratën publike duke nisur nga 1 korriku. Kjo ka forcuar pozicionin e sektorit publik në tregun e punës, duke e bërë më konkurrues ndaj sektorit privat.
Në një kohë kur bizneset private përballen me mungesë të fuqisë punëtore dhe emigracion të lartë, sektori publik po konsolidohet gjithnjë e më shumë si një ndër zgjedhjet kryesore për punësim në vend.
