Shtatëdhjetë vite pasi nisi studimet e saj, Maryette McFarland nga Londonderry, Angli më në fund arriti të diplomohej për Letërsi.
“Vështirë ta besoj, më është dashur shumë kohë për ta arritur,” tha ajo.
90-vjeçarja ishte më e moshuara ndër më shumë se 300 të diplomuar në ceremoninë e universitetit që u mbajt në Belfast.
Historia e saj është një shembull i vendosmërisë, durimit dhe ndihmës nga miqtë, mësuesit dhe familja.
Zonja McFarland kishte filluar universitetin në Dublin në vitet 1960, por dashuria ndërhyri përpara se ta përfundonte diplomën.
Ajo tha se braktisi studimet për t’u martuar. Pas disa vitesh, vendosi të rifillonte studimet, ndërsa po rikuperohej nga një aksident automobilistik.
“Kisha pak kohë të lirë dhe mendova se doja të bëja diçka,” tha ajo për BBC News NI.
Studimet online ishin sfiduese në disa raste, por ajo theksoi se familja, përfshirë katër fëmijët, nipërit dhe mbesat, si dhe stërnipërit ishin “të mrekullueshëm”.
“Jam shumë e dobët me teknologjinë, por pata shumë ndihmë nga familja,” tha ajo, duke shtuar se nusja e djalit e mësoi si të shkruante në kompjuter.
Maryette kishte një mesazh për këdo që mendon se është shumë vonë për të mësuar diçka të re: “Nëse unë munda ta bëj, kushdo mundet. Asnjëherë nuk është vonë.” /Skyweb.al
