Transporti ajror në Shqipëri ka shënuar një rritje të fortë gjatë tremujorit të tretë të vitit 2025, duke arritur nivele rekord si në numrin e fluturimeve, ashtu edhe në trafikun ajror.
Sipas të dhënave zyrtare, në periudhën korrik–shtator 2025 kanë operuar në vend 31 shoqëri ajrore, nga të cilat 30 janë kompani të huaja dhe vetëm 1 shqiptare.
Kjo përbën një rritje të ndjeshme krahasuar me të njëjtën periudhë të një viti më parë, kur operonin 28 kompani, raporton Skyweb.al.
Në hapësirën ajrore shqiptare janë regjistruar 139.923 avionë, ku 83,6 % e tyre janë fluturime tranzite.
Vetëm gjatë këtij tremujori janë realizuar 22.938 fluturime, duke tejkaluar ndjeshëm rekordin e mëparshëm dhe duke reflektuar kërkesën e lartë për destinacionet turistike dhe lidhjet ndërkombëtare të Shqipërisë.
Po ashtu, numri i mbikalimeve ajrore ka arritur në 116.985, nga 111.141 në të njëjtën periudhë të vitit 2024, një rritje që tregon intensifikimin e përdorimit të korridoreve ajrore shqiptare nga kompanitë ndërkombëtare.
Edhe transporti ajror i mallrave, përfshirë postën, ka shënuar rritje.
Në tremujorin e tretë 2025 u transportuan 714,3 ton mallra, nga të cilat 78,5 % ishin mallra hyrëse dhe 21,5 % mallra dalëse, duke u rritur me 25,1 % krahasuar me të njëjtin tremujor të vitit 2024.
Të dhënat konfirmojnë se aviacioni civil shqiptar po përjeton një bum zhvillimi, falë rritjes së ndjeshme të kërkesës për udhëtime, investimeve në infrastrukturë dhe zgjerimit të rrjeteve të linjave ajrore që e lidhin Shqipërinë me destinacionet kryesore evropiane. /skyweb.al
