Fluturimet me charter me të huajt që kanë destinacion bregdetin shqiptar nisin në mesin e muajit maj. Gjatë gjithë sezonit të verës pritet që të kryhen rreth 2 mijë fluturime me charter, që sjellin në vend pushues me grupe të organizuara.
“Fluturimin e parë e kemi në datën 14 maj. Vjen nga Polonia, më vonë fillojmë nga Çekia, Gjermania. Tregjet më besnike janë tregu polak, çek, sllovak, hungarez, gjerman, tregu balltik, nordik dhe ai iberik e portugez”, thotë kreu i Unionit Turistik Shqiptar, Rrahman Kasa.
Turizmi i organizuar ka ardhur në rritje. Sipas kreut të Unionit Turistik Shqiptar, këtë sezon numri i rezervimeve në strukturat akomoduese në vend është më i lartë krahasuar me një vit më parë.
“Ka më shumë dhoma të kontraktuara. Rreth 20% më shumë krahasuar me një vit më parë. Kjo ka ndodhur si pasojë e kërkesës që ka vendi ynë nga viti në vit dhe kompania bën një biznes plan bazuar mbi kërkesën dhe duke parë interesin kontrakton më shumë”, shton Kasa.
Por cilët janë faktorët që kanë ndikuar në rritjen e kësaj kategorie turistësh, krahasuar me vendet e rajonit?
“Ne kemi një favor përveçse çmimit pak më të ulët. Ne ofrojmë kushte edhe më të mira, sepse strukturat e hoteleve tona janë të reja dhe kjo është ndoshta ajo që rrit interesin për të bërë pushime në Shqipëri”, shprehet kreu i Unionit Turistik Shqiptar.
Për turoperatorët, të huajt që zgjedhin të mbërrijnë në vend në këtë formë të organizuar janë më cilësorë, duke ndikuar në turizmin e qëndrueshëm dhe të kontrolluar./Tvklan
