Buxheti i vitit 2026 reflekton një zhvendosje të qartë drejt forcimit të kapaciteteve ushtarake. Sipas projektbuxhetit të depozituar në Kuvend, Ministria e Mbrojtjes do të ketë në dispozicion 58.9 miliardë lekë, ose rreth 10 miliardë lekë më shumë se një vit më parë.
Kjo përfaqëson një rritje prej 20%, e cila e rendit këtë ministri ndër institucionet me përfitimin më të madh në financim.
Në raport me ekonominë kombëtare, fondi për mbrojtjen arrin në 2.36% të PBB-së, nga më pak se 2% që ishte në vitin 2025.
Rritja përkon me angazhimet e marra nga Shqipëria në kuadër të NATO-s, pas samitit të Hagës, ku vendet anëtare miratuan objektivin për rritjen e shpenzimeve të mbrojtjes në 5% të PBB-së deri në vitin 2034.
Sipas Ministrisë së Mbrojtjes, fondet e reja do të përdoren për modernizimin e infrastrukturës ushtarake, pajisjen e forcave me armatim bashkëkohor dhe përmirësimin e kushteve të punës në bazat e Forcave të Armatosura.
Një pjesë e buxhetit është parashikuar për rritjen e pjesëmarrjes së trupave shqiptare në operacionet ndërkombëtare të NATO-s, si dhe për forcimin e gatishmërisë për mbrojtjen kombëtare dhe menaxhimin e krizave.
Në qendër të prioriteteve qëndron gjithashtu lartësimi i figurës së ushtarakut, përmes politikave të karrierës, rritjes së transparencës dhe masave kundër korrupsionit në radhët e Forcave të Armatosura.
Rritja e fortë e buxhetit për mbrojtjen e vendit pasqyron frymën e përgjithshme në Perëndim për rritjen e kapaciteteve mbrojtëse përballë tensioneve të reja gjeopolitike dhe nevojës për siguri kolektive./skyweb.al
