Nga 1 janari 2026, të gjitha pagat e punonjësve të administratës publike – në nivel qendror dhe vendor – do të indeksohen çdo vit në bazë të inflacionit. Kryeministri Edi Rama e cilësoi këtë si një “politikë të re pagash”, që shoqërohet me rritje të përgjithshme si rezultat i rritjes së pagës minimale në vend.
Sipas Ramës, mësuesit do të përfitojnë rritje prej 3 mijë lekësh në muaj, ndërsa për kategori të tjera të administratës shtetërore shtesa shkon deri në 10 mijë lekë në muaj.
“10.600 punonjës të shërbimit – sanitare, shoferë, teknikë, protokollistë, arkivistë, magazinierë – do të përfitojnë nga rritja e pagës minimale me 10 mijë lekë të reja në muaj. Për specialistët e administratës publike, rritja do të jetë 5 mijë lekë, ndërsa për mësuesit 3 mijë lekë në muaj,” tha Rama.
Risi këtë herë është edhe vlerësimi i vjetërsisë në punë, që përfshihet për herë të parë në sistemin shëndetësor. Pagat e mjekëve dhe infermierëve do të pësojnë rritje të ndjeshme:
-
Mjekët e përgjithshëm nga 131.700 lekë në 143.500 lekë në muaj.
-
Mjekët spitalorë nga 174.000 në 186.000 lekë.
-
Infermierët nga 87.000 në 92.500 lekë në muaj.
Një skemë e ngjashme do të zbatohet edhe për punonjësit e Policisë së Shtetit, ku përveç indeksimit do të ketë dhe shtesë për vjetërsinë. Për gradat e ulëta, kjo do të përkthehet në një rritje mesatare prej 5 mijë lekësh në muaj.
Sipas llogaritjeve, pas përfshirjes së shtesave për kushtet e punës dhe ushqimin:
-
Inspektorët do të përfitojnë paga mesatare rreth 100 mijë lekë në muaj.
-
Nënkomisarët deri në 116 mijë lekë.
-
Komisarët deri në 125.600 lekë.
-
Drejtuesit e thjeshtë rreth 156.450 lekë në muaj.
Kryeministri theksoi se për këtë politikë të re pagash, qeveria do të shtojë afro 100 milionë euro në vitin e parë të zbatimit, duke synuar një sistem pagash më të drejtë dhe të harmonizuar me rritjen e kostos së jetesës. /skyweb.al
