Euro ka prekur këtë të enjte nivelin më të ulët historik në raport me monedhën shqiptare, duke vijuar rënien e pandërprerë të muajve të fundit.
Sipas kursit zyrtar të Bankës së Shqipërisë, një euro u këmbye sot me vetëm 93.57 lekë. Ky është niveli më i ulët i regjistruar ndonjëherë për monedhën europiane në tregun shqiptar.
Që nga fillimi i vitit, euro është zhvlerësuar me rreth 3.3%, ndërsa krahasuar me të njëjtën periudhë të vitit të kaluar rënia arrin në 4.1%.
Sipas agjentëve të këmbimit valutor, forcimi i lekut po ndikohet nga oferta e lartë e euros në treg, kryesisht për shkak të sezonit turistik. Gjysma e dytë e korrikut dhe pjesa e parë e gushtit përkojnë me kulmin e sezonit, kur hyrjet e valutës së huaj në ekonomi arrijnë nivelet më të larta.
Shtimi i ofertës dhe kërkesa më e dobët për euro po ushtrojnë presion të vazhdueshëm në uljen e kursit.
Megjithatë, zhvlerësimi i monedhës europiane nuk është kufizuar vetëm në periudhën e verës.
Gjatë viteve të fundit, euro ka humbur terren edhe jashtë sezonit turistik, duke sinjalizuar një rritje më të qëndrueshme të valutës që hyn në ekonominë shqiptare.
Kursi i ulët favorizon importuesit dhe qytetarët që blejnë në euro, por prek negativisht eksportuesit, familjet që marrin remitanca dhe bizneset që sigurojnë të ardhura në monedhën europiane. /skyweb.al
