Qeveria ka vendosur të rrisë ndjeshëm buxhetin për qeverisjen elektronike gjatë vitit 2026, duke e çuar në rreth 200 milionë euro, nga 125 milionë euro që ishte në vitin 2025. Rritja është mbi 75 milionë euro, ndër më të mëdhatë në sektorin e teknologjisë dhe administratës publike.
Pjesa më e madhe e fondeve do të menaxhohet nga Agjencia Kombëtare e Shoqërisë së Informacionit (AKSHI), përmes platformës e-Albania dhe shërbimeve të tjera dixhitale që operojnë nën varësinë e saj. Por, siç tregohet nga tenderët e viteve të fundit, paratë e qeverisjes elektronike kanë përfunduar thuajse gjithmonë në duart e të njëjtëve biznesmenë: Ermal Beqiri i “Soft & Solution”, Gerond Meçe i “Advanced Business Solutions”, Panajot Gjiknuri i “Kretax”, si dhe Gentian Likaj i Communication Progress.
Tenderat e AKSHI-t janë karakterizuar ndër vite nga mungesa e transparencës dhe garës, ndërsa muajt e fundit janë bllokuar disa procedura për shkak të ankesave në Komisionin e Prokurimit Publik (KPP), pas një lufte të ashpër mes Gerond Meçes dhe Ermal Beqirit për kontratat shumëmilionëshe.
Sipas të dhënave nga projekbuxheti për vitin 2026, për programin “Qeverisje elektronike” janë planifikuar 18.99 miliardë lekë, ekuivalente me rreth 200 milionë euro.
Një vit më parë, fondi ishte 12.5 miliardë lekë, çka tregon një rritje të konsiderueshme prej gati 50%.
Qeveria e justifikon këtë rritje me nevojën për “modernizim të shërbimeve online”, por në praktikë fondet përqendrohen në projekte që përsëriten nga viti në vit, si mirëmbajtja e platformës e-Albania, zhvillimi i portaleve institucionale dhe integrimi i databazave publike.
Në këtë kategori përfshihen edhe shërbime si marrja e informacionit nga faqet e institucioneve, shkarkimi i formularëve zyrtarë, aksesi në të dhëna personale apo regjistra, dorëzimi i deklaratave tatimore dhe ankesave, si edhe shërbimet e sigurimeve shoqërore online.
Rritja e buxhetit vjen në një kohë kur AKSHI dhe tenderat e tij janë nën kritika për mungesë gare dhe përqendrim kontratash te një grup i vogël kompanish, që tashmë konsiderohen “tendermarrësit e përhershëm” të teknologjisë në Shqipëri. /skyweb.al
