Shqipëria është vlerësuar për hapat e rëndësishëm që ka ndërmarrë në përmirësimin e sistemit të sigurimeve dhe pensioneve private, duke u afruar gjithnjë e më shumë me standardet e Bashkimit Evropian.
Vlerësimi u bë gjatë Konferencës Globale të Organizatës Ndërkombëtare të Mbikëqyrësve të Sigurimeve (IAIS), që po zhvillohet për herë të parë në Tiranë, me pjesëmarrjen e 500 përfaqësuesve ndërkombëtarë nga autoritete rregullatore, kompani sigurimesh dhe institucione financiare.
Në fjalën e saj, drejtoresha e Autoritetit Evropian të Sigurimeve dhe Pensioneve Profesionale (EIOPA), Petra Hielkema, theksoi se Shqipëria ka një plan të qartë veprimi për zbatimin e standardeve të BE-së, ndërsa shtoi se rezultate të dukshme priten që në fillim të vitit të ardhshëm.
Ajo vuri në dukje se rruga e Shqipërisë drejt integrimit të plotë financiar është e lidhur me zbatimin e direktivës Solvency II, që synon forcimin e stabilitetit të tregut të sigurimeve dhe mbrojtjen e konsumatorëve. “Shqipëria po ecën në drejtimin e duhur, me hapa të qëndrueshëm për të zbatuar procesin e integrimit financiar sipas standardeve të Bashkimit Evropian,” u shpreh Hielkema.
Sa i përket strukturës së tregut të sigurimeve, ku produktet e detyrueshme si MTPL (sigurimi i automjeteve)dominojnë pjesën më të madhe të tregut, Hielkema nënvizoi nevojën për zhvillimin e produkteve vullnetare si sigurimet e jetës, të pronës dhe të të korrave bujqësore.
Ajo theksoi se “është e rëndësishme që qytetarët të kuptojnë rëndësinë e kursimit për pensionin që në moshë të re dhe të mbrojnë pasurinë e tyre përballë rreziqeve natyrore dhe ekonomike.”
Drejtoresha e EIOPA shtoi gjithashtu se sfidat e tregut shqiptar nuk janë unike, pasi edhe vende të tjera të Bashkimit Evropian kanë struktura të ngjashme, ku sigurimet motorike mbeten produkti dominues. “Shumë shtete anëtare ndajnë të njëjtën sfidë: pak sigurime pronash, pak kursime për pensione, dhe ne duhet të punojmë bashkë për t’i ndryshuar këto tendenca,” tha ajo.
Lidhur me perspektivën e tregut të sigurimeve shqiptare pas integrimit në tregun e vetëm evropian, Hielkema u shpreh optimiste se konkurrenca e re nuk do të zëvendësojë aktorët vendas, por do të sjellë produkte të reja dhe më shumë zgjedhje për qytetarët. “Në çdo vend të BE-së ekzistojnë ende lojtarë vendas, edhe pse prezenca e kompanive ndërkombëtare ka sjellë më shumë inovacion dhe produkte të standardeve evropiane,” theksoi ajo.
Ky vlerësim ndërkombëtar e pozicionon Shqipërinë si një shembull pozitiv të reformës në tregjet financiare, në prag të fazës së re të integrimit evropian. /skyweb.al
