Enti Rregullator i Energjisë njoftoi furnizuesit për mundësinë lidhur me përzgjedhjen e furnizuesit të mundësisë së fundit. Këtë detyrë aktualisht e luan një njësi e veçantë pranë Furnizuesit të Shërbimit Universal pjesë e OSHEE Group dhe që garanton mbulimin me energji të gjithë subjekteve që dalin në treg të lirë dhe nuk kanë arritur të gjejnë një furnizuesit privat.
“Sipas Ligjit nr. 43/2015 “Për Sektorin e Energjisë Elektrike”, i ndryshuar, FMF është një shoqëri e licencuar për kryerjen e veprimtarisë së furnizimit dhe e ngarkuar me detyrimin e furnizimit të mundësisë së fundit, i cili ofron për një periudhë të kufizuar kohe shërbimin e furnizimit në kushte të rregulluara ndaj klientëve, dhe që i nënshtrohet çmimeve të përcaktuara në përputhje me Metodologjinë e përcaktimit të çmimit të shitjes së energjisë elektrike nga Furnizuesi i Mundësisë së Fundit, të miratuar nga ERE” sqaron Enti në njoftimin e tij të garës.
ERE nënvizon se ofrimi i shërbimit të furnizimit me energji elektrike, nga Furnizuesi i Mundësisë së Fundit, sipas legjislacionit në fuqi, ofrohet kur a) furnizuesi tjetër ka ndërprerë furnizimin e energjisë elektrike b) klienti ka shlyer detyrimet ndaj furnizuesit të mëparshëm c) klienti ka dëshmuar pamundësinë e furnizimit me energji elektrike nga furnizues të tjerë.
Të drejtën për të qenë pjesë e kësaj gare e ka çdo furnizues mjaft që të përmbushë kushtet e vendosura në dokumentet e konkursit.
Konkretisht aplikanti duhet të jetë në gjendje të sigurojë prova për: a. Resurset administrative, teknologjinë e informacionit, sistemet e faturimit dhe burimet njerëzore me aftësinë për të transferuar një numër të madh të të dhënave të klientëve, me përgjegjësi, saktësi dhe në kohën e duhur; b. Treguesit operacionalë dhe financiarë, të aftë të identifikojnë se cilëve klientë u shërbehen nën kushtet e FMF, dhe cilëve klientë në kushtet e një furnizuesi të energjisë; c. Kapacitetin financiar për të furnizuar me energji elektrike të mjaftueshme shtesë, për të përmbushur kërkesat e klientëve që furnizohen në kushtet e mundësisë së fundit, pa cenuar shërbimin ndaj klientëve të tjerë me të cilët ka nënshkruar kontratë furnizimi.
Po kështu aplikanti duhet të garantojë dhe dokumentojë që mund t’u shërbejë klientëve në kushtet e furnizimit të mundësisë së fundit, duke garantuar një shërbim të vazhdueshëm për një periudhë prej gjashtëdhjetë (60) ditësh ose prej 2 vjetësh për klientët që dalin për herë të parë në treg të liberalizuar. Për këtë qëllim depoziton në aplikim, kontratat e lidhura gjatë vitit të fundit të sigurimit të shërbimit të furnizimit. /Monitor
