Kuvendi miratoi në orët e para të mëngjesit projektbuxhetin e vitit 2026, pas një seance që zgjati rreth 16 orë dhe përfundoi rreth orës 03:00. Buxheti me vlerë 8.8 miliardë euro mori 83 vota pro, të gjitha nga socialistët, ndërsa opozita votoi kundër.
Dy deputetë të PS, Erion Braçe dhe Vullnet Sinaj, dolën nga linja e grupit duke mos marrë pjesë në disa prej votimeve të paketës fiskale.
Gjatë seancës u miratuan edhe 8 projektligjet e paketës fiskale, përfshirë ndryshimet në ligjin për tatimin mbi të ardhurat, TVSH-në, taksat vendore, marrëveshjen e paqes fiskale dhe rivlerësimin e pasurive. Braçe nuk mori pjesë në votim për ligjin e taksave vendore, ndërsa Sinaj mungoi në dy votime të lidhura me paqen fiskale dhe rivlerësimin e pasurisë.
Projektbuxheti i vitit 2026 parashikon fonde për shëndetësinë, rritjen e pagave, skemat e ndihmës për familjet në nevojë, pensionet, arsimin, bujqësinë, investimet në transportin rrugor, drejtësinë dhe rritjen e shpenzimeve për mbrojtjen në funksion të detyrimeve ndaj NATO-s.
Pjesë e paketës fiskale është edhe falja e rreth 500 milionë eurove detyrime të papaguara deri në vitin 2014, si dhe lehtësimi i borxheve të akumuluara nga viti 2015 deri në 2024, me kusht që një pjesë e tyre të shlyhet brenda vitit 2026.
Ndërkohë, marrëveshja e paqes fiskale i lejon bizneset e mëdha të negociojnë fitimin e tyre për tre vitet e ardhshme, duke i shtuar fitimit të deklaruar një marzh 18 për qind dhe duke taksuar me 5 për qind çdo të ardhur mbi këtë nivel.
Ligji për rivlerësimin e pasurisë u jep qytetarëve mundësinë të përafrojnë vlerën e pronës me tregun me një normë tatimore të reduktuar prej 5 për qind.
Ndryshimet në ligjin e TVSH rikthejnë kompensimin 10 për qind për fermerët, ndërsa kufizimet e reja në procedurat tatimore ulin tavanin e pagesave cash mes bizneseve dhe vendosin kufi për pagesat në dorë të individëve dhe të vetëpunësuarve.
Me paketën e miratuar, qeveria synon uljen e përdorimit të parasë fizike, rritjen e formalizimit të ekonomisë dhe zgjerimin e lehtësive fiskale për sportin, kërkimin dhe zhvillimin. /skyweb.al
