Tarifat roaming midis Shqipërisë dhe Bashkimit Europian do të hiqen përfundimisht në vitin 2026. Lajmi u konfirmua nga kryeministri Edi Rama gjatë tryezës së përbashkët në Tiranë me komisioneren për zgjerimin, Marta Kos dhe liderët e gjashtë vendeve të Ballkanit Perëndimor, në kuadër të samitit “Plani i Rritjes, rruga jonë në BE”.
Rama deklaroi se Shqipëria ka përfunduar heqjen e tarifave të brendshme roaming dhe se, me finalizimin e bazës ligjore nga Komisioni Europian, do të nisë faza e fundit drejt modelit “roaming light at home”, që i jep fund tarifimit të ndarë mes BE-së dhe rajonit. Sipas tij, bisedimet me BE-në nisin në fillim të 2026 dhe vendi do të jetë plotësisht i harmonizuar deri në prill të po atij viti.
Kryeministri theksoi se arritja do të jetë një sukses i rëndësishëm pas aplikimit në SEPA, duke e cilësuar heqjen e roaming si një hap drejt eliminimit të barrierave artificiale që pengojnë lëvizjen dhe komunikimin.
Ai shtoi se Shqipëria është gati të prezantojë edhe identitetin digjital që nga fillimi i vitit të ri, një proces që sipas tij e vendos vendin përpara Bashkimit Europian, i cili e ka parashikuar nisjen në 2027.
Në fjalën e saj, komisionerja Marta Kos u shpreh se Bashkimi Europian po bëhet gjithnjë e më shumë një realitet i prekshëm për qytetarët shqiptarë. Ajo nënvizoi se vendet e Ballkanit Perëndimor duhet të forcojnë bashkëpunimin rajonal për të rritur ekonomitë dhe për të shfrytëzuar më mirë mbështetjen financiare të BE-së.
Kos theksoi se deri tani janë disbursuar më pak se 10 për qind e fondeve nga paketa prej 6 miliardë eurosh, çka tregon nevojën për ritëm më të lartë në zbatimin e projekteve. Ajo shtoi se pjesëmarrja e vendeve të rajonit në tregun e energjisë të BE-së, zinxhirët europianë të vlerës dhe krijimi i një tregu të përbashkët rajonal do të sillnin rritje ekonomike deri në 10 për qind.
Samiti i Tiranës u zhvillua në kuadër të diskutimeve mbi “Planin e Rritjes” të BE-së për Ballkanin Perëndimor, një iniciativë që synon të përshpejtojë integrimin ekonomik dhe institucional të rajonit. /skyweb.al
