Tregu shqiptar i sigurimeve ka regjistruar në vitin 2025 rezultatin financiar më të lartë historik, me një fitim total prej 3.54 miliardë lekësh, ose rreth 36.6 milionë euro. Sipas të dhënave të Autoritetit të Mbikëqyrjes Financiare, fitimi u rrit me 55.8% krahasuar me vitin 2024.
Peshën kryesore në këtë rezultat e mbajti tregu i sigurimeve të Jo-Jetës, ku kompanitë realizuan 3.14 miliardë lekë fitim, 56.3% më shumë se një vit më parë. Edhe kompanitë e sigurimit të Jetës përmirësuan ndjeshëm rezultatin, me fitim 402 milionë lekë, në rritje vjetore me 51.7%.
Rritja e fitimeve u shoqërua edhe me një përmirësim të fortë të rentabilitetit të kompanive.
Kthimi nga kapitali arriti në 16.02%, nga 11.2% në vitin 2024, ndërsa kthimi nga aktivet u rrit nga 3.98% në 5.62%.
Sipas AMF-së, një nga arsyet kryesore ishte rritja e primeve të shkruara bruto me 10.6%, ndërsa primi i fituar neto arriti në 21.25 miliardë lekë, 7% më shumë se një vit më parë.
Sigurimet e Jo-Jetës vazhdojnë të dominojnë tregun, me rreth 24.7 miliardë lekë prime dhe 91% të totalit. Brenda këtij segmenti, sigurimet e detyrueshme motorike mbeten produkti kryesor, me 16.9 miliardë lekë prime, ose 68.6% të tregut.
Vetëm sigurimi i brendshëm motorik TPL përbën 58% të primeve të Jo-Jetës dhe gjatë vitit 2025 shënoi një rritje prej 13.3%.
Në këtë ecuri ka ndikuar edhe sistemi i ri i përllogaritjes së primit mbi bazën e rrezikut, i futur në fuqi gjatë vitit të kaluar.
Rritje më të shpejtë shënoi tregu i sigurimit të Jetës, ku primet arritën në 2.44 miliardë lekë, 17.6% më shumë se në vitin 2024.
Produkti kryesor mbetet sigurimi i jetës së debitorit, i lidhur kryesisht me kreditë bankare, i cili përbën 77.5% të primeve të këtij segmenti.
Ndërkohë, dëmet e paguara bruto në të gjithë tregun ranë me 0.75%, ndërsa shpenzimet operative u rritën me vetëm 5%, më ngadalë se primet.
Kombinimi i më shumë të ardhurave nga primet, rritjes më të moderuar të kostove dhe rënies së dëmeve të paguara ka përmirësuar ndjeshëm rezultatin financiar të kompanive.
Në fund të vitit 2025, aktivet totale të tregut arritën në 63 miliardë lekë, ose rreth 650 milionë euro, duke u zgjeruar me 10.3% krahasuar me një vit më parë.
