Këtë vit, kancelari gjerman Friedrich Merz është zotuar të ndërtojë ushtrinë më të fortë të EUropës, një objektiv ambicioz për një vend që për vite të tëra ka neglizhuar forcat e veta të armatosura.
Qeveria e koalicionit shpreson se një projektligj i ri, i arritur javën e kaluar, do ta kthejë këtë synim në realitet, duke forcuar ushtrinë gjermane përballë kërcënimit të perceptuar nga Rusia dhe ndryshimeve të mëdha në politikën e jashtme të SHBA-së.
Reformat e gjera synojnë rritjen e numrit të trupave në rreth 260,000 ushtarë, nga afërsisht 180,000 që janë aktualisht, si dhe krijimin e një rezerve prej 200,000 personash deri në vitin 2035, raporton CNN.
Fillimisht, fokusi do të jetë te rekrutimi vullnetar, me stimuj më të mëdhenj për ata që bashkohen, përfshirë një rrogë fillestare prej 2,600 euro në muaj, 450 euro më shumë se aktualisht. Nëse objektivat nuk arrihen, qeveria do të ketë mundësinë të aktivizojë rekrutimin e detyrueshëm.
Nga viti i ardhshëm, të gjithë 18-vjeçarët do të marrin një pyetësor rreth interesit për shërbim ushtarak. Për meshkujt, plotësimi i tij do të jetë i detyrueshëm. Ndërsa nga viti 2027, ata do t’i nënshtrohen edhe ekzaminimeve të detyrueshme mjekësore.
Reformat vijnë në një moment kur administrata Trump paralajmëron Evropën se duhet të marrë më shumë përgjegjësi për sigurinë e saj, ndërsa lufta e Rusisë në Ukrainë vazhdon dhe ekspertët paralajmërojnë se Moska mund të synojë edhe një vend të NATO-s. Sipas Minna Ålander, eksperte në Chatham House, Gjermania mund të luajë një rol kyç në mbrojtjen konvencionale të kontinentit, falë pozicionit të saj gjeografik.
Ajo tha se arritja e objektivave të rinj të personelit do të ishte shumë pozitive për Evropën, por më e mundshme të realizohej vetëm në vitet 2030, një kohë që mund të mos jetë mjaftueshëm e shpejtë. Ndërkohë, shefi i mbrojtjes së Gjermanisë, gjenerali Carsten Breuer, paralajmëroi në qershor se NATO duhet të jetë gati për një sulm të mundshëm rus brenda katër viteve të ardhshme, madje që në vitin 2029.
Para projektligjit, CDU dhe SPD kishin debate të gjata për formën e shërbimit të ri. Një ide ishte rekrutimi me short, ku disa të rinj do të përzgjidheshin rastësisht për kontrolle mjekësore dhe më pas për shërbim. Kjo u braktis nga ministri i Mbrojtjes, Boris Pistorius, i cili preferoi një qasje të bazuar te stimujt financiarë.
Gjermania dikur kishte shërbim ushtarak të detyrueshëm për meshkujt 18–23 vjeç, por e pezulloi atë në vitin 2011.
Tani marrëveshja pritet të votohet në Bundestag deri në fund të vitit, dhe nëse miratohet, do të hyjë në fuqi më 1 janar 2026.
Pistorius e përshëndeti draftin, duke theksuar se nuk ka arsye për frikë. Ai argumentoi se sa më e aftë të jetë ushtria për të garantuar mbrojtjen dhe parandalimin, aq më i vogël është rreziku që Gjermania të përfshihet në konflikt. Ai shtoi se modeli gjerman mund të shërbejë si shembull edhe për vendet e tjera europiane, dhe se është në kontakt të ngushtë me drejtuesit e Francës, Mbretërisë së Bashkuar dhe aleatëve të tjerë.
Megjithatë, propozimi mbetet i diskutueshëm, veçanërisht mes të majtës politike. Një sondazh i Forsa-s në tetor tregoi se 80% e votuesve të partisë Die Linke kundërshtojnë rikthimin e çdo forme të detyrueshme të shërbimit ushtarak.
Ålander mendon se arritja e objektivave vetëm me vullnetarë nuk është e pamundur, nëse imazhi i ushtrisë përmirësohet. Por, ajo paralajmëron se rekrutimi i detyrueshëm mund të shtyjë më shumë të rinj drejt ekstremeve politike.
Shumë të rinj gjermanë shprehin skepticizëm. Një 17-vjeçar i tha CNN-it se e kupton rëndësinë e mbrojtjes, por nuk e sheh veten duke luftuar. Një tjetër, Leonid Bekjarov, 21 vjeç, mbështeti investimet më të mëdha për ushtrinë, por u shpreh kundër detyrimit për t’u mobilizuar.
Ndërkohë, aplikimet për statusin e kundërshtarit të ndërgjegjes janë rritur ndjeshëm që nga fillimi i luftës në Ukrainë, mbi 3,000 vetëm deri më 25 tetor, shifra më e lartë që prej vitit 2011.
Për tri dekada pas rënies së Murit të Berlinit, Gjermania shpenzonte më pak se 2% të PBB-së për mbrojtjen, shumë nën objektivat e NATO-s, si rezultat i një kulture politike pacifiste dhe mungesës së kërcënimeve të drejtpërdrejta.
Invasioni rus i Ukrainës në vitin 2022 ndryshoi gjithçka. Ish-kancelari Olaf Scholz shpalli një “Zeitenëende”, duke krijuar një fond prej 100 miliardë eurosh për modernizimin e ushtrisë. Në qershor 2024, Gjermania shënoi për herë të parë që nga Lufta e Dytë Botërore një Ditë të Veteranëve.
Ndryshimi i qasjes u thellua edhe më shumë pasi Merz mori detyrën, duke u zotuar të dyfishojë shpenzimet e mbrojtjes dhe të ndërtojë “ushtrinë më të fortë konvencionale të Evropës”. “Putini kupton vetëm gjuhën e forcës,” tha ai. /Skyweb.al
