Tregu i apartamenteve në Tiranë po hyn në një fazë pasigurie, ndërsa ekspertët paralajmërojnë se duke nisur nga janari 2026 pritet rënie e ndjeshme e çmimeve. Sipas agjentëve imobiliarë dhe ekonomistëve, tregu po shkon drejt një ngopjeje dhe një pjese të madhe të apartamenteve që kanë pritur prej vitesh për t’u hedhur në treg do t’u vijë afati i rivlerësimit.
Agjenti imobiliar Armand Shkëmbi deklaroi në “Opinion” se 7 deri në 10 mijë apartamente pritet të dalin njëherësh në shitje në fillim të vitit 2026, duke ushtruar presion të fortë mbi çmimet.
Shkëmbi: “2026 do të jetë vit i vështirë për tregun imobilar. Shtatë mijë deri në 10 mijë prona do të dalin në shitje duke nisur nga janari 2026, sepse pronarët kanë pritur që të paguajnë më pak taksa dhe të nxjerrin pronat në treg.”
Nga ana tjetër, eksperti i ekonomisë Klodian Muço shprehet se rënia e çmimeve do të jetë më e dukshme në vitin 2027, kur pritet të futen masa më të forta kundër parasë informale në tregun e pasurive të paluajtshme.
Muço:
“Çmimet do të bien në Tiranë, jo në bregdet. Nga 2027 pritet që vendi të marrë masa për të kanalizuar paranë në bankë. Ato çmime 4 mijë, 5 mijë apo 2 mijë euro metri katror nuk paguhen nga qytetari i thjeshtë. Janë para cash që vijnë nga ekonomia informale, korrupsioni apo evazioni. Kur këto para të bllokohen, tregu do të ftohet.”
Diskutimi u zhvendos edhe te diferencat mes zonave. Agjentja Ilda Zaloshnja theksoi se kërkesa në qendër mbetet e lartë, por shqiptarët tashmë mund të orientojnë blerjet në periferi.
Zaloshnja:
“Të gjithë duam të rrimë te sheshi Skënderbej, por nuk është më e mundur. Sot lëvizet me makinë edhe për të blerë bukën.”
Por, ky argument u kundërshtua nga sipërmarrësja Barbara Doda, e cila përmendi çmimet aktuale në periferi, duke theksuar se edhe këto zona po bëhen të papërballueshme për shtresën e mesme.
Doda:
“Nuk po flasim për 5 mijë euro metri katror. Në periferi, çmimet janë po ashtu të larta: në Fresk 1070 euro, në Astir 2330 euro, në Kashar 1290 euro. Unë jam shtresë e mesme dhe nuk e ble dot. Ku ta ble unë pronën?”
Sipas ekspertëve, kombinimi i tre faktorëve, dalja masive e apartamenteve në treg, masat kundër parasë informaledhe ngopja e kërkesës, do të çojë në korrigjime të dukshme të çmimeve, veçanërisht në Tiranë.
Megjithatë, zona bregdetare pritet të ruajnë çmimet e larta për shkak të kërkesës së vazhdueshme nga të huajt.
